«ASAR» úshjaqty yntymaqtastyq forýmynyń qatysýshylary qarar qabyldaıdy

ASTANA. QazAqparat - Atyraýda ekinshi kún respýblıkalyq «ASAR» úshjaqty yntymaqtastyq forýmy ótýde. Forým qorytyndysy boıynsha qatysýshylar úshjaqty yntymaqtastyqty odan ári damytý úshin qolaıly jaǵdaı jasaý týraly qarar qabyldaıdy, dep habarlaıdy QR Din isteri jáne azamattyq qoǵam mınıstrliginiń baspasóz qyzmeti.

Atap aıtqanda, qarar ÚEU, bıznes jáne memlekettiń yntymaqtastyq júıesin jetildirýge, bıznesti áleýmettik salaǵa keńinen tartýdyń tetikteri men quraldaryn jetildirýge, sondaı-aq qoǵamdyq uıymdardyń, bastamashyl azamattardyń áleýetin paıdalanýdy jandandyrýǵa baǵyttalady. Qarar mátininiń tolyq nusqasy asar2017.kz saıtynda jarııalanatyn bolady.

Búgin elimizdiń ár túrli óńirlerinen jınalǵan úkimettik emes uıymdar úshin master-klasstar ótýde. Sheberlik sabaqtaryn tanymal jattyqtyrýshylar  Emın Askerov, Anna Tadjımýratova, Asqar Sekerbaev, Almagúl Qanaǵatova, Abaı Myrhın, Sholpan Aıtenova jáne t.b. ótkizýde.

ÚEU ókilderiniń kásipkerlik daǵdylaryn damytý, kraýdfandıng (qarajat tartý) negizderin úıretý  jáne jergilikti ózin-ózi basqarýǵa ótý shartynda bıznes pen ÚEU-nyń ózara is-qımyl tájirıbesin jolǵa qoıý maqsatynda barlyǵy 8 sheberlik-klasy uıymdastyryldy.

«ASAR» forýmyna respýblıkanyń barlyq óńirlerinen 200-den asa bıznes pen azamattyq sektor ókilderi qatysýda.