Asar: Qyzylordada múmkindigi shekteýli janǵa aýyldastary úı salyp berdi

QYZYLORDA. QazAqparat - Qyzylorda oblysy Qazaly aýdanynda jergilikti turǵyndar asar ádisimen múmkindigi shekteýli otbasyǵa úı salyp berdi, dep habarlaıdy QazAqparat tilshisi.

Aýdanǵa qarasty Q.Pirimov atyndaǵy aýylda turatyn Orysbaı Naýqanbaev - dúnıege kelgennen ekinshi top múgedegi. Áıeli de - múmkindigi shekteýli jan.

Olar turatyn úıdi jyl saıyn sý basyp qalatyn. Bıylǵy kóktemde nóser jańbyr saldarynan mol sý úı ishine deıin jaıylyp ketken. Saldarynan baspana jaramsyz kúıge tústi.

Eldegiler ortaq sheshimge kelip, jańa úıdiń kirpishin qalaýdy bastap ketti.

«Jerlesteri aǵamyzǵa úı salý jóninde sheshimge keldik. Alǵashqyda sanaýly azamattan qarjy jınaıtyn bolyp kelisilgen. Alaıda biz áleýmettik jeli betterinde qysqasha aqparat jarııaladyq. Sodan keıin osy aýylda dúnıege kelgen, qazir elimizdiń ár túkpirinde júrgen azamattar da kómek qolyn sozatynyn jetkizdi. Nebári úsh kúnde qomaqty qarjy jınaldy. Osylaısha ıgilikti iske syrtta júrgen jáne aýyldaǵy aǵaıyn birge jumyldy. Asarǵa kúnine 100 adamǵa deıin jınalǵan ýaqyt boldy», - deıdi mektep muǵalimi Sábıt Yqylasov.

Jerlesteriniń janashyrlyǵy arqasynda múmkindigi shekteýli otbasy jaıly baspanaǵa qol jetkizdi. Jaqynda olar jańa úıge kóshti. Jańa úıge kirgen O.Naýqanbaev óz alǵysyn jetkizdi.

Aıta keteıik, buǵan deıin qazalylyq eriktiler turmysy tómen otbasyna baspana salyp bergen edi.