Asanáli Áshimuly: «Máńgilik El» qoıylymynyń sahnalyq-tehnıkalyq uıymdastyrylýy uqypty boldy

ASTANA. QazAqparat - Qazaq handyǵynyń 550 jyldyǵyna oraı uıymdastyrylǵan «Máńgilik El» teatrlandyrylǵan qoıylymy sahnalanýy boıynsha da, dekoratsııa jaǵynan da óte uqypty uıymdastyrylǵan dúnıe boldy, deıdi «Uly Dala prologyn» oqyp, qoıylymnyń basyn ashqan Qazaqstannyń Halyq ártisi Asanáli Áshimuly.

Teatrylandyrylǵan qoıylymda «O, dala, oıhoı dala, órken dala, Óńkeı bir shildehana ólkem dala! Bilmeımin seni nege teńerimdi, Keń dala, kerik dala, kórkem dala! Árıne, anam boldyń qundaqtaǵan, Árıne, ákem boldyń kún qaqtaǵan. Árıne, jar da boldyń dos ta boldyń, Árıne,ár súıemiń qymbat maǵan...» - degen prologty oqyp, týǵan elge táý etkizgen Asanáli Áshimuly isimizdiń sátti ótýine aldymen ózimiz tilekshi boldyq deıdi.

«Jalpy, qoıylymnyń daıyndyǵynyń ózi joǵary deńgeıde júrdi. Eń bastysy, elge, qarapaıym halyqqa qatty unady. Biz óz jumysymyzdyń «fanatymyz» ǵoı, sondyqtan, osy isimizdiń jaqsy ótýine eń aldymen ózimiz tilekshi boldyq. «Máńgilik El» qoıylymy bastan-aıaq, tipti, jaı daıyndyq kúnderiniń ózi óte tártipti, uqypty uıymdastyryldy», - deıdi Asanáli Áshimuly.

Qazaqstannyń jáne KSRO-nyń Halyq ártisi Asanáli Áshimov ózine qoıylymnyń birinshi bólimi qatty unaǵandyǵyn aıtty.

«Qoıylymnyń dekoratsııasyn, jaryǵyn, tehnıkasyn túzetýge ıtalıandyq mamandar qatysty. Biraq, stsenarıı ózimizdiki, rejısserlik top ta ózimizden boldy. Al Italıadan kelgen mamandar tapsyrys alyp otyrǵan soń, joǵary deńgeıde jaryqtandyryp berýge mindetti edi. Eń bastysy, oınaǵan ártister de, tehnıkaǵa jaýap bergen qyzmetkerler de talaptan shyqty. Óz basyma qoıylymnyń birinshi bólimi qatty unady. Tunyp turǵan tarıh. Ekinshi bólimi syrtqy saıasatymyzǵa kerek dúnıe. Bárin aıt ta birin aıt, eń bastysy qoıylym halyqqa unady. Namysty qoldan bermeıik dep, sharshasaq ta, bastan-aıaq júrdik. Halyqaralyq mádenıet arenasyn óz aýzymyǵa qarata alatynymyzdy dáleldedik», - deıdi A.Áshimuly.

Esterińizge sala keteıik, Qazaq handyǵynyń 550 jyldyǵyna oraı 11 qyrkúıek kúni Astanadaǵy «Barys» muz saraıynda «Máńgilik El» taqyrybynda teatrlandyrylǵan qoıylym ótken bolatyn. Qazaqstan Respýblıkasynyń Prezıdenti Nursultan Nazarbaevtyń «Tarıh tolqynynda» kitabynyń jelisi boıynsha daıyndalǵan qoıylymdy Memleket basshysy Nursultan Nazarbaev, Ázerbaıjan Respýblıkasynyń Prezıdenti Ilham Álıev, Qyrǵyz Respýblıkasynyń Prezıdenti Almazbek Atambaev,sonymen qatar, Túrkııa Respýblıkasy Parlamentiniń tóraǵasy Ismet Iylmaz tamashalaǵan bolatyn.