Asanáli Áshimov «Jibek Joly» telearnasyndaǵy «Jaqsy adamdarym» benefıs-shoýynyń alǵashqy qonaǵy boldy
Almatyda keshe baǵdarlamanyń túsirilimi bastaldy. Benıfıs-shoýdyń alǵashqy qonaǵy retinde Qazaqstannyń halyq ártisi, ańyz adam, áıgili akter Asanáli Áshimov keldi. Baǵdarlamany elimizdegi tanymal estrada juldyzdary Qydyráli Bolmanov pen Qaraqat Ábildına júrgizedi. QazAqparat tilshisi kórermender kózaıymyna aınalatyn osynaý erekshe baǵdarlamanyń alǵashqy túsirilim barysymen tanysyp qaıtqan edi.
«Jibek Joly» arnasynan kórermenge jol tartqaly turǵan baǵdarlama meniń repertýarymdaǵy qazaqqa keńinen tanylǵan «Jaqsy adamdarym» atty áninen negiz alyp tur dep oılaımyn. Arna basshylyǵy men prodıýser baǵdarlama tizginin bizge senip tapsyrǵanan keıin, júktelgen jaýapkershilik mol. Qydyráli ekeýimiz kórermen kóńilinen barynsha shyǵýǵa tyrysamyz. Baǵdarlamanyń alǵashqy keıipkeri – KSRO, QazKSR, Qazaqstannyń halyq ártisi, Memlekettik syılyqtyń laýreaty Asanáli Áshimov. Ańyz, abyz adamnyń aıtary kóp. Ol kisiniń shashbaýyn kóterip jaqyndary, dostary, jaqsy adamdary kelip otyr. Kóńil-kúı tamasha», - dedi Qaraqat Ábildına baǵdarlama túsirilimi aldynda.
«Jaqsy adamdarym» benefıs-shoýynyń prodıýseri Meıramgúl Mádálini de sózge tartqan edik. Onyń aıtýynsha, baǵdarlamanyń maqsaty – nazardan tys qalǵan kópke úlgi azamattardy taýyp, nasıhattaý.
«Dál qazirgi zamanda, áleýmettik jelide adamdar arasynda kıkiljiń óte kóp. Olardyń bir-birimen kerisip, ursysyp jatqanyn jıi kóremiz, oqımyz. Osyndaı kezde aramyzda jaqsy adamdar bar ekenin jáne olar árqaısymyzdyń janymyzda júrgenin bildirip, halyqqa jetkizip, kórsetkimiz keldi. Sondyqtan baǵdarlamany «Jaqsy adamdarym» dep aldyq»,- deıdi prodıýser.
Sondaı-aq kórermen baǵdarlamadan halyqqa tanymal adamdardyń ómirin, eńbegin, shyǵarmashylyǵyn, buryn-sońdy aıtylmaǵan qyr-syryn bile alady.
Prodıýser baǵdarlamanyń formatyna da toqtaldy.
«Habardyń qurylymyna keler bolsaq, bizde bas keıipker bolady jáne onyń aınalasynda iri tulǵalar bar. Stýdııada sol kisilerdiń basyn qosyp, júrgizýshiler ádemi áńgime órbitedi. Bir habardy efırge daıyndap shyǵarý úshin úlken komanda jumys isteıdi. Júzge jýyq maman tartyldy. Shyǵarmashylyq jáne tehnıkalyq toptyń eńbegi zor»,- deıdi ol.
Baǵdarlama «Jibek Joly» arnasynan 23 qyrkúıekten bastap shyǵady. Aptasyna bir ret kórsetiledi. Sonymen qatar ony YouTube platformasynan da kórýge bolady. Efır ýaqytynyń uzaqtyǵy – 1 saǵat.
Aıta keteıik, «Jibek Joly» telearnasy «Qazaqstan Respýblıkasy Prezıdentiniń Teleradıokesheni» KEAQ qurylymyna kiredi. Telearna táýligine 24 saǵat 55% qazaq jáne 45% orys tilinde habar taratady.