Asanáli Áshimov: Elbasy maqalasy mańyzdy, endi sózden iske kósheıik
Aıta keteıik, búgin Almatyda zııaly qaýym ókilderi keshe, 12 sáýir kúni «Egemen Qazaqstan» respýblıkalyq gazetinde jarııalanǵan Elbasynyń «Bolashaqqa baǵdar: rýhanı jańǵyrý» atty maqalasyn taldaýǵa arnalǵan dóńgelek ústel basyna jınaldy. Jıynda Asanáli Áshimov maqalynyń mańyzdylyǵyna toqtaldy.
«Damyǵan elde rýhanııat birinshi orynda turady. Rýhanııat barlyq adamǵa azyq. Elbasy maqalasy óte mańyzdy ári kúrdeli. Buǵan deıin saıası, ekonomıkalyq máseleler kóbirek qozǵalyp keldi, bul joly Elbasymyz rýhanı jańǵyrý máselesin kóterip otyr. Júregimizge qondy. Endi sózden iske kóshý kerek», - dedi qazaq kınosynyń ardageri.
Sonymen qatar, ol latyn árpine kóshýge qatysty óz oıyn aıtty.
«Latynǵa kóshý qanshalyqty kerek, qanshalyqty kereksiz, osyny taldaýymyz kerek. Elbasy týǵan jerge qamqorlyq týraly, qala men dalanyń arasyn jaqyndataıyq degen máseleni aıtyp otyr. Bul qazirgi jaǵdaıda kerek dúnıe. Latyn qarpine kóshý týraly ony qurastyrýshylar aıtady: «latyn qarpi tek qazaq mektepterinde ǵana bolady. Bul qazaq tiline ǵana qatysty», dep. Orys mektepterinde 70 paıyz qazaq balalary oqıdy, olardy qaıtemiz? Aqyry bastasaq, barlyǵyna birdeı jasaý kerek. Orys mektepterin de kóshirý kerek. Óıtpesek, 70 paıyz qazaq bala qaıda qalady? Osyndaı máselelerdi talqylaıyq, shesheıik, búgingi joldaıtyn hatymyzda osyny kórseteıik», - dedi Asanáli Áshimov.
Jıyn sońynda zııaly qaýym ókilderi Elbasy maqalasyna qoldaý tanytyp, óz usynystary jazylǵan hatty Aqordaǵa joldady.