«Asan» fılmi Bakýde arnaıy júldege ıe boldy

ASTANA. QazAqparat - Rejısser Berik Jahanovtyń qysqametrajdy «Asan» fılmi 9-shy Halyqaralyq Start film festival kınofestıvalinde qazylar alqasynyń arnaıy júldesine ıe boldy, dep habarlaıdy QazAqparat.

QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen  bul kartına ákesin aqtyq saparǵa shyǵaryp salýǵa jolǵa shyqqan bozbala týraly.

«Festıvalge myqty fılmder qatysty. «Qazaqfılm» kınostýdııasynyń basshylyǵy men T.Júrgenov atyndaǵy QazUÓA qoldaý kórsetkeni úshin alǵysym sheksiz. Túsirilim tobyn jeńispen quttyqtaımyn, - dedi ázerbaıjandyq kórermenderge fılmin kórsetken rejısser Berik Jahanov.

Bıyl festıvalge qatysýǵa 45 elden 490 fılm usynym jibergen. Qabyldaý komıssııasynyń sheshimi boıynsha negizgi konkýrsqa 30 elden 100 fılm qabyldanǵan.

Negizgi konkýrsty halyqaralyq qazylar alqasy músheleri baǵalaǵan. Start film festival  halyqaralyq festıvalin Ázerbaıjannyń Mádenıet mınıstrligi, Jastar jáne sport mınıstrligi, Jas kınematografıster kınoortalyǵy, Ázerbaıjan jastary jáne óndirýshiler gıldııasy uıymdastyrǵan.  Festıval bıyl «Fılm týraly júz ret estigenshe, júz fılm kórgen artyq» uranymen ótti.

Aıta keterligi, «Asan» fılmi osy jyly Halyqaralyq Kann kınofestıvaliniń Short Film Corner aıasynda kórsetilgen bolatyn.