«Asa qatty sókpeńizdershi»: Mádenıet úıiniń dırektory keshirim surady

AQTÓBE. QazAqparat – Ybyqty saıynda borly taýǵa qashap jazý jazyp, kópshilik synyna ushyraǵan Mádenıet úıiniń dırektory Manas Kósherbaev qazaq elinen keshirim surady, dep habarlaıdy QazAqparat tilshisi.

Oqıǵa Mańǵystaý oblysynyń Ybyqty saıynda boldy. Kópshilik borly taýǵa qashap jazyp, eskertýge qulaq aspaǵan adamdy izdep, jazalanýyn talap etti.

Búgin Manas Kósherbaev jaǵdaıdyń mán-jaıyn túsindirip, halyqtan keshirip surady. «Men Kósherbaev Manas Maratuly 24 tamyzda Mańǵystaý oblysy Aqtaý qalasy Ybyqty saıda bolǵan jaǵdaıǵa baılanysty túsinikteme bergim keledi. Ybyqty saı – Mańǵystaýdyń kórkem jerleriniń biri. Ókinishtisi, qaraýsyz qalǵan. Joly óte nashar, jan-jaǵy qoqysqa toly. Sol ádemi, keremet úńgirdiń ishi tolǵan jazý, ádepsiz sózder. Sondaı bir dóreki sózdi ádemi esimge aınaldyrmaq nıetim ǵana boldy. Ańdaýsyz jaza bastym! Jańylmaıtyn jaq, súrinbeıtin tuıaq bolmaıdy. Asa qatty sókpeńizdershi!! Tarıhı jerge qyldaı qııanat qylý oıymda da bolmady. Barsha otandastarymnan, Mańǵystaý jurtynan basymdy ıip keshirim suraımyn! Ǵafý etińizder»,- dep jazyp, keıin beınekeshirimin jarııalady.

Aıta keteıik, Manas Kósherbaev Aqtóbe qalalyq zaǵıptar qoǵamy mádenıet úıiniń dırektory.

«Qazirgi tańda eńbek demalysynda. Jumysqa shyqqan soń túsindirý jumystary júrgizilip, tıisti sharalar qoldanylady», - dep jazdy Aqtóbe qalalyq mádenıet jáne tilderdi damytý bólimi.