Asa iri mólsherde aqshalaı qarajatty urlaǵan «QTJ» UK Temirjol áskerı kúzetiniń laýazymdy tulǵalary sottaldy

ASTANA. 5 qyrkúıek. QazAqparat - Birinshi satydaǵy sotpen múlkin tárkileýmen 8 jylǵa bas bostandyǵynan aıyrýǵa «Temirjol áskerı kúzeti» AQ ekonomıka jáne qarjy boıynsha vıtse-prezıdenti Shynybekov, «Temirjol áskerı kúzeti» AQ Semeı fılıalynyń bólim bastyǵy Saharıev, esepshileri: Kenjın men Tóregeldınova sottaldy.

Atalǵan fılıaldyń bas esepshisi Alenova 7 jylǵa bas bostandyǵynan aıyryldy.

Qarjy polıtsııasy olardyń 2006-2012 jyldar aralyǵynda eńbek tólemi qoryn arttyrý jolymen kásiporynnyń 236,4 mln. teńgesin urlaǵandyǵyn dáleldedi, dep habarlaıdy vedomstvonyń baspasóz qyzmeti.

Oǵan qosa tekseris nátıjesinde qarjy polıtsııasy organdarymen «Temirjol áskerı kúzeti» AQ ózge de aýmaqtyq fılıaldarynda bıýdjet qarajatyn urlaý faktileri anyqtady. Olar boıynsha qylmystyq ister qozǵalyp tergelýde.

Máselen, Almaty qalasy boıynsha qarjy polıtsııasy departamenti «Temirjol áskerı kúzeti» AQ Almaty qalasyndaǵy fılıalynyń esepshilerine qatysty kásiporynnyń 4 mln.teńgesin urlaý faktisi boıynsha qylmystyq is qozǵady.

Qaraǵandy oblysy boıynsha qarjy polıtsııasy departamenti «Temirjol áskerı kúzeti» AQ Qaraǵandy qalasyndaǵy fılıalynyń laýazymdy tulǵalaryna qatysty kásiporynnyń 400 myń teńgeden astam aqshalaı qarajatyn urlaý faktisi boıynsha qylmystyq isti tergeýde.