As úıimizde únemi túrli ulttardyń taǵamdary turady – ShQO-da turatyn ınternatsıonaldy otbasy

<p>ÓSKEMEN. KAZINFORM &ndash; Shyǵys Qazaqstan oblysy Serebrıansk qalasynyń №19 órt sóndirý bóliminiń radıotelefonshysy Baqytbek Rýslanbektiń ulty &ndash; qyrǵyz. Ol orys qyzy Tatıanany ózine jar qylyp alǵan.</p>

Baqytbek Rýslanbek órt sóndirý bóliminde radıotelefonshy bolyp jumys isteıdi. Qandaı da bir qıyndyqqa tap bolǵan azamattar qutqarýshylarǵa qońyraý shalsa birinshi bolyp olarmen Baqytbek sóılesedi. 

«Kóbinese halyq úılerinde órt shyqqanyn nemese bir oqys oqıǵaǵa tap bolǵanyn aıtyp, kómek suraıdy. Jumysym ózime unaıdy. Tańerteń jumysqa, keshke úıge asyǵamyn», - deıdi ol. 

Foto: ShQO TJD

Onyń Tatıanamen shańyraq kótergenine 2 jyldan asqan. Áıeli osy ýaqyt ishinde qyrǵyzdyń ulttyq taǵamdaryn túgel derlik ázirleýdi úırengen. Úıge jıi jáne kóp bolyp keletin kúıeýiniń týystaryn kútýdi ábden meńgerip aldy. Al Baqytbek óz kezeginde zaıybynyń ultyndaǵy dástúrlermen jaqsy tanysqan. 

«Bizdiń úı árqashan jyly, jaıly. Tańǵy asqa quımaq bolsa, keshke et asamyz. As úıimizde únemi túrli ulttardyń taǵamdary turady, - dedıi Baqytbek Rýslanbek.

Foto: ShQO TJD

Bul №19 órt sóndirý bólimindegi jalǵyz ınternatsıonaldy otbasy emes. Bastyqtyń orynbasary Rashıd Ganıevtiń de áıeli orys. Onyń da esimi – Tatıana. 

«Jubaıym ekeýmizdiń ortaq dostarymyz, tanystarymyz kóp. Olar qazaqtar, orystar, ýkraındar, tatarlar jáne basqa da ult ókilderi. Biz bárimiz aralasyp, merekelerdi birge qarsy alamyz», - deıdi Rashıdtiń áıeli Tatıana.

Foto: ShQO TJD

Ganıevter otbasynda birneshe tilde sóıleıtin, túrli ulttardyń ádet-ǵuryptaryn qurmetteıtin jáne mádenı is-sharalarǵa belsendi qatysatyn eki ul tárbıelenýde. 
Jalpy ShQO TJD qatarynda barlyǵy 19 ınternatsıonaldy otbasy bar.