Arzan ıpotekany úsh jaqty kelisimshartpen berýge bolady – ekonomıst
Ekonomıst Baýyrjan Ysqaqovtyń oıynsha, búginde ekinshi deńgeıli bankter úshin halyqqa 7 protsenttik ıpotekany bergen tıimsiz. Sol sebepti ondaı nesıeler eshbir deldalsyz tikeleı halyqqa taratylýy ábden múmkin.
«Ol úshin Prezıdent Ulttyq banktiń janynan arnaıy qarjy ınstıtýtyn qurýdy tapsyrdy. Negizi, bizde ondaı ınstıtýt bar. Ol - Qazaqstannyń ıpotekalyq kompanııasy. Bizge onyń qyzmetin qaıtalaıtyn taǵy bir kompanııanyń qajeti joq. Sondyqtan bul másele «Nurly jer» baǵdarlamasyna ózgeris engizip, Qazaqstannyń ıpotekalyq kompanııasynyń jarǵylyq kapıtalyn ulǵaıtý arqyly sheshiletin shyǵar», - dedi B.Ysqaqov QazAqparat tilshisine bergen suhbatynda.
Onyń aıtýynsha, arzan ıpotekany úsh jaqty kelisimshartpen berýge bolady. Ipotekalyq kompanııa úıdiń aqshasyn qurylys kompanııasyna aýdarady. Al páterdi alǵan adam aqshany kompanııanyń ózine tólep otyrady.
«Bul jerde memlekettiń aqshasyn qurylys kompanııasynyń tikeleı ózine, ıaǵnı deldalsyz aýdarǵan durys. Sebebi árbir deldaldyń óziniń marjasy bolady. Ol da - tutynýshyǵa túsetin qosymsha salmaq. Sondyqtan bul jerde úshjaqty kelisimshart eshbir deldalsyz bolýy qajet. Ipotekalyq kompanııa qurylystyń aqshasyn tóleıdi de, páterlerdi kepilzatqa qoıady. Al ony alǵan adamdar 7 protsentpen ıpotekany tólep otyrady. Negizi, mehanızmi óte qarapaıym», - deıdi B.Ysqaqov.
Ekonomıstiń sózine qaraǵanda, halyq tarapynan jańa baǵdarlama aıasynda salynatyn baspanaǵa suranys joǵary bolady. Endigi másele, osy sanattaǵy turǵyn úılerdiń sapasyn qatań baqylaýdy ustaý qajet. «Sosyn arzan ıpoteka tek daıyn úılerge ǵana berilýi kerek. Onsyz spekýlıatıvti áreketter bolýy ábden múmkin», - dep atap kórsetti B.Ysqaqov.
Aıta keteıik, ótken aptada QR Premer-Mınıstr Baqytjan Saǵyntaev «7-20-25» baǵdarlamasyn iske asyrý tetikterin ázirleýdi tapsyrdy.
foto: zhetysu.gov.kz