Arzan ıpoteka turǵyn úıdiń sapasyna keri áser etpeıdi - Qasymbek
«Myna bir máseleni eskerý kerek, 7 paıyzdyq ıpoteka bankter arqyly berilmeıdi. Úkimet pen Ulttyq bank arnaıy kompanııany quratyn bolady. Atalǵan kompanııa arzan ıpotekany berýmen aınalysady. Máselen, qazirgi kezde ekinshi deńgeıli bankterde ıpotekanyń jyldyq mólsherlemesi 15-17 protsentti quraıdy. Al jańa kompanııany Ulttyq bank sýbsıdııalaıdy. Sonyń arqasynda 7 protsenttik ıpoteka berýge múmkindik bolady. Atalǵan shara turǵyn úıdiń sapasyna keri áserin tıgizbeıdi», - dedi J.Qasymbek Úkimet otyrysynan keıingi baspasóz máslıhatynda.
Mınıstrdiń aıtýynsha, Qazaqstannyń ıpotekalyq kompanııasy jańa baǵdarlamaǵa aralaspaıdy. Atalǵan uıym óz qyzmetin «Nurly jer» baǵdarlamasy aıasynda jalǵastyra beredi. Búginde QIK arqyly beriletin ıpotekanyń sońǵy mólsherlemesi 10 protsentti qurap otyr.
Aıta keteıik, Parlament palatalarynyń birlesken otyrysynda Memleket basshysy Nursultan Nazarbaev qazaqstandyqtardy baspanamen qamtamasyz etýdiń jańa baǵdarlamasyn ázirleýdi tapsyrdy. Osyǵan baılanysty QR Ulttyq banki janynan 7 protsenttik ıpotekany beretin jańa kompanııa qurylady.