Arzan azyq-túlikti qaıdan alýǵa bolady – mınıstrlik jaýaby

ASTANA. QazAqparat – Saýda jáne ıntegratsııa birinshi vıtse-mınıstri Arman Shaqqalıev qazaqstandyqtarǵa azyq-túlikti tómen baǵamen satyp alýdyń jolyn usyndy, dep habarlaıdy QazAqparat tilshisi.

«Azyq-túlikti arzan baǵamen satyp alýǵa kelsek, bul – eń aldymen baqylaý-kassalyq apparattarymen jabdyqtalǵan iri saýda jelileri. Sebebi, baǵaǵa qatysty kúmán týyndaǵan jaǵdaıda, tek chek arqyly ýákiletti organdar men saýda departamentine júgine alady. Osylaısha, baǵany ósirý faktisin rastaýǵa nemese joqqa shyǵarýǵa bolady. Órkenıetti saýda formaty boıynsha taýarlardy satyp alý oryndary óte mańyzdy. Bul áleýmettik mańyzy bar taýarlarǵa da qatysty», - dedi Arman Shaqqalıev tilshi saýalyna oraı ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, A. Shaqqalıev elimizde keıbir azyq-túlik baǵasy tómendegenin aıtty.

«Sońǵy aptadaǵy derekterdi taldaý nátıjesi keıbir azyq-túlik baǵasynyń túskenin kórsetip otyr. Qaraqumyq, qant, kartop, kúnbaǵys maıynyń baǵasy tómendedi. Jalpy, elimiz boıynsha 0,7-den 2,2%-ǵa deıin arzandaý baıqalady. Eger biz taýar nomenklatýrasy boıynsha basqa toptaǵy taýarlar týraly aıtar bolsaq, árıne barlyq jerde baǵanyń tómendeýi joq. Biraq, ósý bar», - deıdi ol.