Arystyń kósheleri jóndeýden ótip, káriz júıeleri jańartyldy – qala ákimi
Qala basshysynyń sózinshe, qalpyna keltirý jumystary 17 sektor arqyly júzege asyrylǵan. Qala boıynsha 8522 turǵyn úı bar bolatyn bolsa, onyń ishinde 104-i kópqabatty baspana sanalady. Búginde turǵyn úıler boıynsha qurylys jumystary tolyǵymen aıaqtalyp, aǵymdaǵy jáne kúrdeli jóndeý jumystary jalǵasýda.
«Bastapqy kezde 22 úı súrilip, qaıta salynýy tıis bolsa, keıin jóndeý jumystary kezinde olardyń sany 474 úıge jetti. Kúni búginge deıin barlyǵy salynyp, qabyrǵalary turǵyzylǵan. Shatyrlary jabylyp, ishki árleý jáne jylý kirgizý jumystary júrgizilýde. Qalada 11 sektor jumystaryn tolyǵymen aıaqtap, qaıtyp ketti. Qalǵan 6 sektorda qujattandyrý sııaqty sońǵy jumystar júrgizilip, aıaqtalýǵa jaqyn»,- deıdi Arys qalasynyń ákimi.
Murat Qabyrbektiń aıtýynsha, qaladaǵy ınfraqurylymdy retteý barysynda Arys qalasynyń káriz júıeleri tolyq jóndeýden ótip, avtomattandyrylǵan. Qala jylytý maýsymyna da tolyq daıyn. Zaqym kelgen Arys kósheleri de jóndeýden ótti. Onda aıaqjoldar salý jumystary aıaqtalyp, jaryqtandyrý júrgizilip jatyr.
«Qala kósheleriniń 98 paıyzy jóndelip bitken. 63 kósheni jóndeý kerek bolsa, sonyń 60-ynda jumystar tolyqtaı aıaqtalǵan. Taǵy 3 kóshede sońǵy jumystar júrgizilip jatyr. Sonymen qatar qalanyń aýmaǵynda 500-den asa kásipkerlik nysany bolatyn bolsa, olardyń barlyǵynda kásipkerler óz esepterinen jóndeý jumystaryn júrgizip jatyr. «Atameken» Ulttyq kásipkerlik palatasy arqyly olarǵa ótemaqy tólenýde»,- deıdi qala basshysy.
Ol sondaı-aq, áleýmettik mańyzy bar 64 nysan «Samuryq-Qazyna» ulttyq ál-aýqat qory» esebinen jóndelgenin jetkizdi. Atalǵan qor arqyly jaramsyz kúıge túsken 3 nysan qaıta salynǵan. Olardyń qatarynda sporttyq keshen, jedel járdem qyzmeti men tis emdeý ortalyqtary bar. Bul nysandar osy aıdyń sońynda paıdalanýǵa beriledi dep kútilýde.