Arystyń barlyq mektebinde alǵashqy qońyraý soǵyldy

TÚRKІSTAN. QazAqparat – Búgin Arys qalasyndaǵy barlyq 40 mektepte alǵashqy qońyraý soǵylyp, oqýshylar bilim uıalarynyń tabaldyryǵyn attady, dep habarlaıdy QazAqparat.

Shahardaǵy I.Jýrba atyndaǵy jalpy orta mektepte ótken saltanatty sharaǵa Túrkistan oblysy ákiminiń orynbasary Sáken Qalqamanov, «Samuryq-Qazyna» jyljymaıtyn múlik qory» AQ Basqarma tóraǵasy Arman Jetpisbaev qatysty.

Búgin Arys qalasynda 2500-ge jýyq oqýshy 1-synyp tabaldyryǵyn attasa, Túrkistan oblysy boıynsha 56 506 baldyrǵan mektepke alǵash bardy. Oblysta jalpy sany 488 520 oqýshy bilim alady.

Óńirde 1 qyrkúıekte jańadan 7 mektep ashyldy. Jyl sońyna deıin taǵy 15 mektep paıdalanýǵa beriledi. «Aıta keterligi, Arys qalasyndaǵy áleýmettik nysandardy qalpyna keltirý jumystarymen »Samuryq - Qazyna« UÁQ» AQ aınalysýda. Kompanııa óńirdegi 16 orta mektepti 100 paıyz qalpyna keltirip, oqý jylyna daıyndap úlgerdi. Búgingi tańda Arys qalasynda qalpyna keltirilýi tıis 68 áleýmettik ınfraqurylym nysandarynyń 63-i paıdalanýǵa berilgen. Qalǵan 5 nysan qyrkúıek jáne qazan aılarynda tapsyrylatyn bolady», - dedi Túrkistan oblysy ákiminiń baspasóz qyzmetinen.