Arystyq balalar «Otyrar» jazǵy saýyqtyrý lagerinde demalýda
Arys qalasynda oryn alǵan jaǵdaı jalpy qazaq eliniń qabyrǵasyn qaıystyrǵan oqıǵa boldy. Áıtse de, arystyqtardyń basyna túsken synaqty el bolyp kóterip, jumyla kómektesýdiń arqasynda qalaǵa qaıta jan bite bastady. Búginde Túrkistan oblysynyń ákimi Ómirzaq Shókeevtiń tikeleı basshylyǵymen qalany qaıta qalpyna keltirý jumystary qarqyndy júrgizilýde.
El basyna kún týǵanda otyrarlyqtar da qarap qalmady. Aýdan ákimi Erlan Aıtahanov bastaǵan aımaqtyń depýtattary, kásipkerleri men belsendi jastary jáne erikti azamattar kúndiz-túni damyl tappaı qalany tazartý jumystaryn jasap jatyr. Buǵan deıin otyrarlyqtar arystyq aǵaıyndarǵa qonaqjaılylyq tanytyp, baýyryna basyp, azyq-túlik, kıim-keshekpen qamtamasyz etken bolatyn. Arystaǵy jaǵdaı qalypqa kelgen soń eline asyqqan kórshiles aǵaıynǵa otyrarlyqtar kómek qolyn sozyp, olardy úılerine jaıǵastyryp, qajetti zattaryn alyp berip júr.
Arystyqtar úılerine jaıǵasyp bolǵansha olardyń balalary Túlkibas aýdany, Kelte Mashat aýylyndaǵy «Otyrar» jazǵy saýyqtyrý lagerine demalýda. Aýdan basshysynyń tapsyrmasyna sáıkes ol jaqta da arystyq balalar ystyq tamaqpen, kıim-keshekpen qamtylyp, túrli sporttyq jáne mádenı is-sharalar uıymdastyrylýda. Ondaǵy basty maqsat - úreılengen balalardyń qıyndyqty umytyp, balaýsa balǵyn shaqtaryn kóńildi, ári ýaıymsyz ótkizý. Salqyn aýa, tabıǵaty kelisken taýly aımaq balalardy alańsyz qýanyshqa bólep, máz-meıram kúıge bólegen. Otyrarlyq balalarmen birge til tabysyp, dop teýip, sýǵa shomylyp, án salyp, bı bılep júrgen balǵyn balalardyń júzderine kúlki úıirilip, kóńilderi shattyqqa kenelgen. Tań qylań berisimen ár topqa bólinip, urandap sapqa turyp, taýǵa serýendep bir sát tynyǵyp qaıtatyn balalar bir-birimen jaqyn syrlasatyn dostar taýyp, áńgimeleri jarasyp máre-sáre bolyp júr.
Arystyq balalarmen birge kelgen Arman Oralbaev 9 jasta. Onyń ata-anasy qazirgi tańda Arys qalasynda. Fýtbol oınaýdy jaqsy kóretin Arman lagerdegi demalys kúnderiniń jaqsy ótip jatqanyn aıtyp, osyndaı qyzyqty demalysty uıymdastyrǵan Otyrar aýdanynyń ákimine alǵysy sheksiz ekenin jetkizdi.