Arysty jandandyrýǵa belsendi azamattar da atsalysady

ARYS. QazAqparat - Túrkistan oblysy ákiminiń keńesshisi Ulasbek Sádibekov Arys qalasynyń belsendi azamattarymen kezdesti, dep habarlaıdy QazAqparat óńir basshysynyń baspasóz qyzmetine silteme jasap.

Jıynǵa máslıhat depýtattary, aqsaqaldar, áıelder keńesiniń tóraıymy, úkimettik emes uıym jetekshileri, qala ımamdary qatysty.

Jıynnyń basty maqsaty - halyqqa aqparattyq, ıdeologııalyq baǵytta túsindirý jumystaryn júrgizý jáne el basyna túsken qıyn sátte birligimiz ben yntymaǵymyzdyń bekemdigin, myzǵymastyǵyn saqtaý jolynda birlese jumystar atqarý. Oblys ákiminiń keńesshisi aldymen Arys qalasyn qaıta qalpyna keltirý, turǵyndardyń qajettiligin oryndaý barysynda atqarylyp jatqan jumystardyń barysymen tanystyrdy.

«Qazirgi tańda Arysta qurylys jumystary qarqyn alyp, halyqqa gýmanıtarlyq kómek turaqty túrde berilip keldi. Turǵyndarǵa beriletin áleýmettik kómektiń 5 baǵyty anyqtaldy. Atalǵan baǵyttar boıynsha jumys atqarylýda», - dedi Ulasbek Sádibekuly.

Sondaı-aq jıynda sóz alǵan oblystyq Іshki saıasat basqarmasynyń basshysy Beısenbaı Tájibaev áleýmettik jelilerde jarııalanyp jatqan túrli jalǵan aqparattarǵa senbeı, barlyq jumystardyń júrgizilý barysyna kóz jetkizýlerin surady.

Jınalǵan qoǵam belsendileri men arnaıy uıym músheleriniń oılary bir jerden shyǵyp, qaladaǵy árbir aımaqqa belsendi azamattar arasynan ókil taǵaıyndap, halyqpen tikeleı jumys jasaý boıynsha ortaq kelisimge keldi.

Jıyn sońynda Ulasbek Sádibekov qalalyq máslıhat hatshysy, «Nur Otan» partııasy Arys qalalyq fılıaly tóraǵasynyń birinshi orynbasarymen birge «Nur Otan» partııasy Arys qalalyq fılıaly ǵımaratynda bas qosyp, osy jumystardyń júrgizilý barysyn qadaǵalap otyrýdy qolǵa alatynyn jetkizdi.