Arysty qalpyna keltirýge Úkimet rezervinen qarjy bólinedi
«Arystaǵy oqıǵa elimiz úlken qaıǵyly jaǵdaı. Ózderińiz biletindeı, Memleket basshysy jarylys bolǵan kúni jumys tobymen Arys qalasynda boldy. Adamdardy jedel kóshirý, ornalastyrý jáne tamaqtandyrý sharalary uıymdastyryldy», - dep toqtaldy Á. Samaıylov halyqpen eseptik kezdesýinde.
Osy oraıda, ol birinshi kezektegi sharalardy qabyldaý maqsatynda Prezıdent tıisti tapsyrmalardy bergenin atap ótti.
«Barlyq qajetti jumystar uıymdastyryldy. Turǵyn úılerdi, ınjenerlik jelilerdi, áleýmettik jáne basqa da ınfraqurylymdy qalpyna keltirý úshin QR Úkimeti rezervinen qarjy bólinedi. Jaqyn arada keltirilgen zalaldyń kólemi baǵalanady, osy rette qajetti esepteýler daıyndaldy. Barlyq qalpyna keltirý jumystaryn jyldamdatylǵan tártipte júrgizemiz. Osy sharalar Úkimet baqylaýynda bolady», - dedi Premer-Mınıstrdiń birinshi orynbasary.
Sonymen qatar, Á. Smaıylov osy kúnderi Arys qalasy turǵyndaryna kómek kórsetip jatqan el halqyna alǵysyn aıtty.
Onyń sózine qaraǵanda, «Arys, biz birgemiz!» aktsııasy aıasynda Qarjy mınıstrligi men onyń komıtetteri qyzmetshileri bir kúndik eńbekaqysyn aýdardy. Bul qarjy turǵyndarǵa gýmanıtarlyq kómek kórsetýge baǵyttalady.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.