Arysty qalpyna keltirý: 100 jyldan astam tarıhy bar temirjol vokzaly qalaı jóndelip jatyr
Bul týraly «Samuryq-Qazyna» jyljymaıtyn múlik qory» AQ Basqarma tóraǵasynyń orynbasary Arman Jetpisbaı málimdedi.
«2019 jyldyń 10 shildesinde bekitilgen QR Úkimetiniń qaýlysymen «Samuryq-Qazyna» qory Arystaǵy jarylystan zaqym kelgen áleýmettik nysandardy qalpyna keltirýdi qarjylandyrdy. Barlyq jumystar shilde aıynda bastaldy. Jalpy sany 68 nysandy qalpyna keltirý josparlanǵan. Onyń ishinde 16 mektep, 1 kolledj, 36 balabaqsha, 8 densaýlyq saqtaý nysany jáne 4 sporttyq nysan bar jáne Arys temirjol vokzalyn, Batyrlar alleıasy men Ortalyq alańdy qalpyna keltirý jumystary júrip jatyr», - dedi Arman Jetpisbaı «Samuryq-Qazyna» ǵımaratynda ótken baspasóz máslıhatynda.
Sonymen birge, jóndeý jumystary júrip jatqan nysandar arasynda jergilikti mańyzy bar tarıhı ǵımarat bar.
«Arys temir jol vokzaly – qalanyń kórneki oryndarynyń biri. Ol 1904 jyly boıy kótergen jáne tarıhı turǵyda asa mańyzdy nysan bolyp sanalady. 2010 jyly Ońtústik Qazaqstan oblysy ákiminiń qaýlysymen vokzal jergilikti mańyzy bar eskertkishter tizimine engen. Ondaǵy jóndeý jumystary 24 tamyzǵa deıin aıaqtalýy tıis. Merdiger kompanııa osyndaı nysandarda jóndeý júrgizýge ruqsaty bar kompanııamen birlesip jumys isteýde. Ǵımarattyń sáýlettik kelbeti men konstrýktıvtiligi burynǵydaı saqtalady», - dep túsindirdi Arman Jetpisbaı.
Atalǵan nysandardyń 64-i qaıta jóndeýden ótedi jáne 4-eýi súrilip, qaıta salynady.
«Jedel medıtsınalyq járdem bólimi, stomatologııa bólimi, balalar men jasóspirimderdiń sporttyq mektebi men «Bekzada» balabaqshasynyń ǵımarattary jańadan salynady. Bul 4 ǵımarat qyrkúıek-qazan aılarynda paıdalanýǵa beriledi. Osy jumystardyń barlyǵyna «Samuryq-Qazyna» qory 7 mlrd teńge bóldi. Premer-Mınıstr Asqar Mamınniń tapsyrmasyna sáıkes, barlyq jóndeý jumystary 20 tamyzǵa deıin, ıaǵnı jańa oqý jylyna deıin aıaqtalýy tıis. Úkimet basshysy apta saıyn Arys qalasyna barady, biz oǵan atqarylǵan jumys boıynsha esep beremiz. Ázirge, 56 nysandy jóndeý jumystary tolyq aıaqtaldy, 8 nysan 20 tamyzǵa deıin qoldanysqa beriledi», - dedi A. Jetpisbaı.
Onyń aıtýynsha, qoldanylǵan qurylys materıaldary barlyq normalar men talaptarǵa saı, sapa sertıfıkattaryna ıe. Barlyq 16 mektep jıhaz, parta, shkaf, taqta syndy qajetti jabdyqtarmen qamtylady.
Eske sala ketsek, 24 maýsym kúni tańerteń Arys qalasyndaǵy áskerı bólimniń qoımasynda jarylys bolǵan edi. Ondaǵy úı-jaılar men ǵımarattardyń 80-90 paıyzyna túrli deńgeıde zaqym keldi.