Arystanbek Muhamedıulynyń orynbasaryn sot zalynan jedel járdem alyp ketti

ASTANA. QazAqparat – Ulttyq mýzeıdiń burynǵy dırektory Arystanbek Muhamedıuly men onyń sybaılastarynyń ústinen qozǵalǵan qylmystyq istiń sot otyrysy kelesi aptaǵa aýystyryldy, dep habarlaıdy QazAqparat tilshisi.

Eske salaıyq, 17 sáýirde Ulttyq mýzeıdiń burynǵy dırektory Arystanbek Muhamedıuly men onyń sybaılastarynyń (Almaz Nurazhan, Azamat Kóshenov, Aıym Sádýaqasova) isi boıynsha sot otyrysy bastaldy.

Qylmystyq is elordanyń №2 Baıqońyr aýdandyq sotynda qaralyp jatyr.

Búgingi sot otyrysy barysynda aıyptalýshylardyń biri Almaz Nurazhan ózin jaısyz sezinip, kómek keregin málim etti.

Osylaısha sottalýshyny otyrys zalynan jedel járdem alyp ketti.

Sýdıa óz kezeginde sot otyrysyn 24 sáýir saǵat 10:00-ge aýystyrdy.

«A. Nurazhandy jedel járdem brıgadasy klınıkaǵa alyp ketti, qaısy klınıka ekenin bilmedim. Dıagnoz qoıý úshin belgili bir sala mamandarynyń kómegi qajet», - dedi aıyptalýshynyń advokaty Mustahım Tóleev.

Buǵan deıin Arystanbek Muhamedıuly men sybaılastaryna qandaı aıyp taǵylǵany belgili boldy.

Óz kezeginde aıyptalýshy Arystanbek Muhamedıuly kinásin moıyndamady.

Sondaı-aq, sot Arystanbek Muhamedıulyn úıqamaqqa aýystyrýdan bas tartqan edi.

Eske salaıyq, byltyr 28 mamyrda sot sanktsııasymen sol kezdegi Ulttyq mýzeı dırektory Arystanbek Muhamedıuly qamaýǵa alynǵan bolatyn.