Arystanbek Muhamedıulyna qatysty is sotqa tústi

ASTANA. QazAqparat – Arystanbek Muhamedıuly men ózge de tulǵalarǵa qatysty is Astana qalasynyń Baıqońyr aýdandyq sotyna tústi, dep habarlaıdy QazAqparat tilshisi.

«Baıqońyr aýdandyq №2 soty bıýdjet qarajatyn talan-tarajǵa salý aıyby taǵylǵan A. Muhamedıuly, A. Nurazhan, A. Kóshenov jáne A. Sadýaqasovany aıyptaý boıynsha qylmystyq isti óndiriske aldy. Atalǵan qylmystyq is boıynsha basty sot talqylaýy ashyq sot otyrysynda 2023 jylǵy 17 sáýir kúni saǵat 10:00-ge belgilengen», - delingen Astana qalalyq sotynyń baspasóz qyzmeti taratqan aqparatta.

Esterińizge sala keteıik, 2022 jyldyń 28 mamyrynda sot sanktsııasymen Ulttyq mýzeı dırektory Arystanbek Muhamedıulyna qatysty «kúzetpen ustaý» bultartpaý sharasy tańdaldy.

Tergeý «Altyn adamnyń álem murajaılary boıynsha sherýi» halyqaralyq kórmesin ótkizýge, sondaı-aq «Qazaqstannyń ulttyq kıeli nysandary men mýzeı qorlaryn jalpymemlekettik fotogrammetrııalyq 3D-skanerleý» jáne «Qazaqstan Respýblıkasynyń Ulttyq tsıfrlyq kınokollektsııasyn tsıfrlandyrý» jobalaryna bólingen bıýdjet qarajatyn urlaý faktileri boıynsha júrgizildi.

Budan basqa, A. Muhamedıulynyń Mádenıet jáne sport mınıstri laýazymynda bolǵan kezinde týystarynyń jáne úlestes tulǵalarynyń menshigine «Sý jáne qoldanbaly sport túrleri boıynsha respýblıkalyq joǵary sport sheberligi mektebi» RMQK, «Qazaq entsıklopedııasy» AQ jáne «Qazaq ǵylymı-zertteý mádenıet ınstıtýty» JShS zańsyz berýge qatystylyǵy tekserildi.

Tergelgen qylmystyq ister boıynsha memleketke keltirilgen zalaldyń aldyn ala somasy shamamen 7 mlrd teńge dep baǵalandy.