Arystanbek Muhamedıuly: Júrsin Ermanmen aıtysqa qatysty úlken josparymyz bar

ASTANA. QazAqparat - QR Mádenıet jáne sport mınıstri Arystanbek Muhamedıuly aıtys tóńiregindegi túıtkildi saýaldarǵa jaýap berdi, dep habarlaıdy QazAqparat.

Búgin Úkimet úıinde ótken baspasóz máslıhaty barysynda BAQ ókilderi mınıstrden: «16 oblysta aıtys ótkizildi. Al sonyń jeńimpazdarymen «Altyn dombyra» aıtysy nelikten ótpeı qaldy? Júrsin Ermandar nege basqa aıtys ótkizdi? Osyǵan qaraǵanda aıtys ekige bólingeni me?», - dep suraǵan edi.

«Árıne, aıtys bizdiń tól dástúrimiz. Qazirgi kezde Qazaqstanda keńinen damyp kele jatyr. Aıtys  jekelegen tulǵalardyń menshiktep alǵan kásibi emes. Ol búkil halyqtyń,  qazaq halqynyń rýhanı baılyǵy. Sol sebepti  biz qazir aıtysty aımaqtarda uıymdastyramyz. Máselen, Aqtóbede, elimizdiń basqa da aımaqtarynda ótti»,-  dedi ol.

Onyń aıtýynsha, jergilikti ákimdikter aıtys qazylar alqasynyń tóraǵasy kim bolatyndyǵyn, alqaǵa múshe bolyp kimder shaqyrylatyndyǵyn sheship, ony mınıstrlikpen kelisedi. Jalpy, qazylar alqasyn belgileýdiń arnaıy erejesi  de bar.

«Al Júrsin Ermanǵa kelsek, biz ol kisige úlken qurmetpen  qaraımyz. Ózderińiz bilesizder, ol kisi jeltoqsannyń 28-29-ynda  Almatyda aıtys ótkizdi. Sol kezde habarlasyp, mınıstrlikten qandaı kómek kerektigin  suradyq. Bylaısha aıtqanda ol kisimen birge aıtysqa qatysty jumys isteýge úlken josparymyz bar», - dedi mınıstr.

Onyń aıtýynsha, Aqtóbedegi aıtysqa elimizdiń 16 óńirinde uıymdastyrylǵan aıtystyń jeńimpazdary qatysqan.

«Aıtys óte joǵary deńgeıde ótti. Teledıdardan da kórsetildi», - dedi ol.