Arystanbek Muhamedıuly Pavlodar oblysyndaǵy qaıǵyly qazaǵa baılanysty marqumdardyń týystaryna kóńil aıtty

ASTANA. QazAqparat - Mádenıet jáne sport mınıstri Arystanbek Muhamedıuly jol apatynan Pavlodar oblysynyń Mádenıet, muraǵattar jáne qujattama basqarmasynyń bastyǵy Ardaq Raıymbekov, onyń áıeli jáne úsh jasar ulynyń qaza bolýyna baılanysty marqumdardyń týǵan-týystaryna kóńil aıtty, dep habarlaıdy QazAqparat tilshisi.

Mınıstr bul týraly Feısbýk paraqshasynda jazdy.

«Búgin Pavlodar oblysynan qaıǵyly jańalyq keldi. Jol apatynan Pavlodar oblysynyń Mádenıet, muraǵattar jáne qujattama basqarmasynyń bastyǵy Ardaq Raıymbekov, onyń áıeli jáne úsh jasar uly qaza boldy. Orny tolmas qaıǵy. Óte jas, ádemi, daryndy baýyrlarymyz. Ardaq bar joǵy 35 jasta edi, alda áli talaı baǵyndyrar belesteri kóp dep úmit etetinbiz. Qaza bolǵandardyń týystary men jaqyndaryna qaıǵyryp kóńil aıtamyn. Qaıǵyly oqıǵa. Biz sizdermen birgemiz. Berik bolyńyzdar. Imandy bolsyn!», - dep jazdy mınıstr.

Eske sala ketsek, Pavlodar oblysynda «NOWO» jáne «BMW» kólikteri soqtyǵysyp, 4 adam ajal qushqan bolatyn. Keıin jeńil avtokólikte kóz jumǵandar - Ardaq Raıymbekov pen onyń otbasy ekenin Pavlodar oblysynyń mádenıet, arhıvter jáne qujattama basqarmasy rastaǵan edi.