Arystanbek Muhamedıuly qazaqstandyqtardy Paralımpıadanyń altyn medalimen quttyqtady
«Eń birinshiden, búkil qazaqstandyqtardy tamasha jeńispen quttyqtaımyn. Phenchhandaǵy Paralımpıada oıyndarynda bizdiń qazaqstandyq Aleksandr Kolıadın altyn medal utyp aldy. Ol bizdiń tarıhymyzdaǵy eleýli oqıǵa. Bul bárimiz úshin úlken qýanysh. Sol úshin barsha qazaqstandyqtardy asqaq jeńisimen quttyqtaǵym keledi», - dedi Arystanbek Muhamedıuly Astanada ótken Qazaqstan Respýblıkasy men Ózbekstan Respýblıkasy arasyndaǵy ekijaqty yntymaqtastyq jónindegi úkimetaralyq komıssııasynyń 17-otyrysynda tilshilerge bergen suhbatynda.
Eske sala ketsek, qazaqstandyq shańǵyshy Aleksandr Kolıadın Phenchhandaǵy Paralımpıadada altyn medaldy jeńip alǵan bolatyn.
14 naýryzda ótken shańǵy jarysy Qazaqstan úshin jeńispen aıaqtaldy. Klassıkalyq ádispen 1,5 shaqyrymdyq sprınterlik shańǵy jarysynda jarysqan sportshylar arasynda qazaqstandyq sportshy irikteý kezeńinde de, jartylaı fınalda da úzdik boldy. Aleksandr Kolıadın fınalda 4 mınýt 19,7 sekýnd nátıjesin kórsetip, aldyna jan salmady. Kúmis medal japonııalyq Ioshıhıro Nıttanyń enshisinde ketse, «qolaǵa» Kanada ókili Mark Arendz jáne Fınlıandııadan Iıkk Týomısto qol jetkizdi.