Arystanbek Muhamedıuly isine mınıstr pikir bildirdi

NUR-SULTAN. QazAqparat – QR Mádenıet jáne sport mınıstri Dáýren Abaev Ulttyq mýzeı dırektory Arystanbek Muhamedıulynyń sybaılas jemqorlyq isi týraly pikir bildirdi, dep habarlaıdy QazAqparat tilshisi.

«Arystanbek Muhamedıuly boıynsha tergeý men sot óz úkimin shyǵarady dep oılaımyn», - dep jaýap berdi D. Abaev Úkimet úıinde tilshiler suraǵyna.

Jýrnalıster Arystanbek Muhamedıulynan bólek, birneshe adamnyń kúdikke ilingenin aıtyp, eger olardyń kinási rastalsa, mınıstr otstavkaǵa ketýge daıyn ba dep surady.

«Eger bul jymqyrýlar men basshylyq etken jyldary bolsa, onda men otstavkaǵa ketýge daıynmyn. Qashan bolǵanyn sybaılas jemqorlyqqa qarsy is-qımyl agenttiginen suraǵan jón», - dep jaýap berdi Dáýren Abaev.

Aıta keteıik, Arystanbek Muhamedıuly qazir qamaýda otyr. Ol iri kólemde qarajat jymqyrdy dep aıyptalýda.

«Nur-Cultan qalasy boıynsha Sybaılas jemqorlyqqa qarsy qyzmet «Altyn adamnyń álem mýzeılerine sherýi» halyqaralyq kórmesin ótkizý jónindegi memlekettik satyp alý týraly shart aıasynda Qazaqstan Respýblıkasy Ulttyq mýzeıiniń laýazymdy adamdaryna jáne basqa da tulǵalarǵa bıýdjet qarajatyn jymqyrý belgileri boıynsha 146 mıllıon teńge somasynda sotqa deıingi tergep-tekserýdi júrgizedi», dep jazdy vedomstvo.

Aqparat kózi 2022 jylǵy 28 mamyrda sottyń sanktsııasymen Ulttyq mýzeı dırektory Arystanbek Muhamedıulyna qatysty kúzetpen ustaý sharasy tańdalǵanyn málimdedi.