Arystanbek Muhamedıuly Gınnestiń rekordtar kitabyna engisi keledi

ASTANA. QazAqparat - Elordada  Malerdiń №8 sımfonııasyn bir mezette 1500 adam oryndaıdy. Bul týraly búgin QR Úkimetiniń selektorlyq rejimdegi otyrysynda elimizdiń Mádenıet jáne sport mınıstri Arystanbek Muhamedıuly málim etti, dep habarlaıdy QazAqparat.

«Qazir biz ashyq aspan aıasynda úlken týyndylardy sahnalaýdy nasıhattaý ústindemiz. Bul durys ta. Máselen, «Aıda» operasyn, «Don Kıhot» baletin sahnalaǵan edik. Endi alǵash ret  «Qyz Jibekti» kórsetetin bolamyz. Taǵy bir aıta keterligi, biz Malerdiń №8 sımfonııasyn tuńǵysh ret qoımaq nıettemiz. Oǵan 1500 adam qatysady. ıAǵnı, buǵan deıin 1400 adam bir mezette osy sımfonııany oryndap rekord ornatqan bolatyn. Biz 1500 adamnyń oryndaýynda rekordtar kitabyna engimiz keledi», - dedi Muhamedıuly.

Aıta keteıik, buǵan deıin  Arystanbek Muhamedıuly EKSPO-2017 halyqaralyq mamandandyrylǵan kórmesi aıasynda Dımash Qudaıbergen eki kún kontsert beretindigin aıtqanyn habarlaǵan edik .