Arystanbek Muhamedıuly bokstan QR erler qurama komandasyn quttyqtady (FOTO)
Qytaı Tsıanan aımaǵynda ótken bokstan erler men áıelder arasyndaǵy Azııa jáne muhıt elder arasyndaǵy olımpıadaǵa irikteý týrnırinde bokstan Qazaqstan erler quramasy olımpıadaǵa beriletin 10 joldamany túgendep aldy, dep habarlady vedomstvonyń baspasóz qyzmeti.
«Sizder elimizdiń atyn búkil álemge tanytqan dańqty qazaq boks mektebiniń túlegisizder. Tynymsyz eńbek pen qaısar minezdiń nátıjesinde sizder tolaǵaı tabysqa qol jetkizip, buıyrtsa Rıo-de-Janeıro olımpıadasynda jasyndaı jarqyldap júldeli oralatyndaryńyzǵa kámil senemin. Bul joly táýelsizdik alǵannan beri tuńǵysh ret bokstan erler quramasy olımpıada dodasyna tolyq quramda 10 salmaq dárejesinde barmaq, bul bizdiń úlken jeńisimiz, boksta kóshbasyndaǵy memleket ekenimizdiń aıqyn dáleli.
Sizderge zor tabys, jarqyn jeńis pen temirdeı densaýlyq tilegim keledi! El namysyn, er namysyn qoldan bermeıtinderińizge senimim mol!» delingen mınıstrdiń quttyqtaý jedelhatynda.
Eske sala keteıik, bizdiń ulttyq qurama alǵash ret olımpıada oıyndaryna tolyq quramda barmaq. Ulttyq Olımpıada komıtetiniń málimetterine sáıkes, buǵan deıin erler quramasy 1996 jyly Atlantaǵa 9 boksshymen, 2000 jyly Sıdneıge 7 boksshymen, 2004- jyly Afınaǵa 8 boksshymen, 2008 jyly Beıjiń olımpıadasyna 9 boksshymen, al 2012 jyly London olımpıadasyna 9 boksshymen barǵan bolatyn. Azııa jáne muhıt elderi arasynda ótken irikteý jarysynda el qorjyny 7 joldamamen tolyqty, onyń bireýin qyzdar arasynda synǵa túsken Darıǵa Shákimova ıelengen (75kg). Erler quramasynan joldama alǵandar Oljas Sáttibaev (52 kg), Qaırat Eralıev (56 kg), Abylaıhan Júsipov (64 kg), Jánibek Álimhanuly (75 kg), Ádilbek Nııazymbetov (81 kg) jáne Ivan Dychko (+91 kg).
Buǵan deıin 4 joldamany Danııar Eleýsinov (69 kg) Dohada ótken álem chempıonatynda, Vasılıı Levıt (90 kg) - WSB jobasynda, Birjan Jaqypov (49 kg) ı Berik Abdrahmanov (60 kg) -AIBA Pro-Boxing jobasynda alǵan bolatyn.
Osylaısha ulttyq qurama qorjyny erler boksynan tolyqtaı 10 olımpıada joldamasymen qamtylsa, qyzdar boksynda ázirge 1 joldama bar, qalǵan 2 joldamany boksshy qyzdarymyz Astanada ótetin álem chempıonatynda enshileýge tyrysady.