Arystanbek Muhamedıuly belgili tulǵalardyń analary týraly kitap shyǵardy
Kitap adamzat tarıhyndaǵy álemdik oqıǵalar men mıllıondaǵan adamdardyń taǵdyryna áser etken uly, kórnekti tulǵalardy tárbıelep ósirgen analardyń ómirlik tarıhyna negizdelgen.
Jınaqta QR Tuńǵysh Prezıdenti – Elbasy Nursultan Nazarbaevtyń anasy Áljan Nazarbaeva, RF prezıdenti Vladımır Pýtınniń anasy Marııa Pýtına, amerıkalyq ónertapqysh Tomas Edısonnyń anasy Nensı Elıot, Sıngapýrdyń birinshi premer-mınıstri bolǵan Lı Kýan ıÝ-diń anasy Chýa Djım Neo, Túrkııanyń tuńǵysh prezıdenti bolǵan Kemal Atatúriktiń anasy Zýbeıde hanym jáne ózge de tarıhı tulǵalardyń analary qamtylǵan.
«Jumaqtyń kilti – ananyń tabanynyń astynda» degen keremet sóz bar. Sol oı turǵysynda «Kemeńger tulǵalardyń uly analary» degen kitaptyń tusaýkeseri ótip jatyr. Árıne, bul kitap eń aldymen analarǵa arnalǵan. Kitapta elimizge belgili tulǵalardan, memlekettik qaıratkerlerden basqa, sport pen ǵylym jáne basqa da salalardaǵy qaıratkerlerdiń ómiri alynǵan. Biraq mundaǵy negizgi maqsat – sol tulǵalardyń ómirbaıany emes, analarynyń óz balasynyń tabysqa jetýge sińirgen eńbegin kórsetý. Sondyqtan, bárimizge ystyq bolatyn, júregimizge erekshe sezim beretin kitap bolady dep úmittenemin», - dedi Arystanbek Muhamedıuly Ortalyq kommýnıkatsııalar qyzmetinde ótken kitap tusaýkeserinde.
Sonymen birge, saltanatty sharaǵa QR Parlamenti Senatynyń depýtaty, qoǵam qaıratkeri Nurtóre Júsip pen Qazaqstan halqy Assambleıasy tóraǵasynyń orynbasary, «Qazaq TV» telearnasynyń dırektory Maııa Bekbaeva qatysty.
«Kitapty qolǵa alǵan sátte bir demmen oqyp shyqtym, túrli qyzyqty faktilerdi kórdim. Onda QR Tuńǵysh Prezıldenti Nursultan Nazarbaevtyń anasy Áljan ana týraly ádemi tolǵaýlar, jan tebirenterlik ádemi detaldar bar. Raıymbek batyrdyń basyna baryp, táńirden surap alǵan perzenttiń Qazaqstandy tórtkúl álemge tanytýda sińirgen eńbegi analyq mahabbatpen órnektep jazylǵan. Sonymen birge, Reseı prezıdenti Vladımır Vladımırovıchtiń anasy, kórnekti ǵalym Dmıtrıı Mendeleev, jaryqty oılap tapqan Tomas Edısonnyń analarynyń qandaı qoldaý kórsetkenin jazady. Sol sekildi fýtbol tarlany Pele, boks juldyzy Muhammed Álı, sýretshi Pablo Pıkasso, odan bólek Djordj Vashıngton, Sharl de Goll syndy ár sanattaǵy tarıhı tulǵalardyń analary týraly jyly materıaldar jınaqtalǵan.
Olardyń barlyǵyn baılanystyryp turǵan nárse – ananyń óz perzentine úlken senim artýy, kitap adamnyń tulǵa bop qalyptasýyna ana mahabbaty men meıiriminiń qanshalyqty kerek ekenin kórsetedi. Myna álem keıde qatigez bop bara jatsa, ol analyq mahabbattyń jetispeýinen shyǵar dep oılaımyn. Sondyqtan, kitapty oqyp shyqqan ár adamnyń óz anasyna, jalpy analarǵa qurmeti arta túsedi dep oılaımyn», - deıdi Nurtóre Júsip.
Kitap Almaty qalasyndaǵy «Qazaq entsıklopedııasy» baspasynan 2000 danamen shyǵarylǵan jáne jýyrda qalyń oqyrmanǵa jol tartady.