Arystanbek Muhamedıuly bastaǵan tanymal tulǵalar salt atpen Jetisýdy aralady

TALDYQORǴAN. QazAqparat - Almaty oblysynyń Alakól aýdanynda elimizde tuńǵysh ret uzaq qashyqtyqqa salt attylar serýeni uıymdastyryldy. Sharaǵa QR Mádenıet jáne sport mınıstri Arystanbek Muhamedıuly, «Qazmunaıgaz» AQ basqarma keńesiniń tóraǵasy Saýat Myńbaev, óńir basshylary men elge tanymal sportshylar qatysty, dep habarlaıdy QazAqparat tilshisi.

Alakól aýdanyndaǵy Lepsi aýylynan bastalǵan salt attylar kerýenin elge tanymal metsenat, «Jersý» korporatsııasynyń basqarma keńesiniń tóraǵasy Baýyrjan Ospanov uıymdastyrdy. Sharaǵa qatysýshylar Jońǵar Alataýynyń baýraıymen 50 shaqyrymǵa jýyq qashyqtyqty júrip ótip, Jamantas jaılaýyna kóterildi. Kásipqoı boksshy Qanat Islam, MMA aralas jekpe-jeginiń sportshysy Arman Ospanov, 2004 jylǵy Olımpıada chempıony Baqtııar Artaev, olımpıadanyń kúmis júldegeri Nurbaqyt Teńizbaev syndy el maqtanyshy bolǵan sportshylar birde shaýyp, birde jelip otyryp, birneshe asýlardan ótti. Jol-jónekeı Jetisýdyń keremet tabıǵatyna tamsanyp otyrdy.



Sportshylar arasynda ómirinde alǵash ret atqa mingen azamattar da boldy. Sonyń biri - Vel Barker kýbogynyń ıegeri Baqtııar Artaev. Ol óziniń osy ýaqytqa deıin tulpardyń tizginin ustaýǵa múmkindigi bolmaǵanyn aıtyp, birinshi ret atqa otyrsa da birden úırenip, shaýyp ketkenin qýana jetkizdi. «Demek atqa miný qabileti qanymyzda bar» dep moıyndady ol.

Elbasynyń «Rýhanı jańǵyrý: Bolashaqqa baǵdar» maqalasy aıasynda uıymdastyrylǵan salt attylar serýeniniń basty maqsaty - buqarany jeti qazynamyzdyń biri atqa minýge úndep, salaýatty ómir saltyn qalyptastyrý jáne otandyq týrızmdi damytý. Tabıǵatymyzdy aıalap, týǵan jerimizdiń kórikti jerlerin tanymal tulǵalar arqyly nasıhattaý.

Jamantas jaılaýy teńiz deńgeıinen 2500 metr bıiktikte ornalasqan. «Qazir bul jerde 10 myńǵa jýyq jylqy jaıylyp júr» deıdi kásipker Baýyrjan Ospanov.