Arystanbek Muhamedıuly: Astanadaǵy marafon álemniń eń tanymal telearnalarynan kórsetiledi

ASTANA. QazAqparat - Qazaqstan Respýblıkasynyń Mádenıet jáne sport mınıstri Arystanbek Muhamedıuly «EKSPO-2017» halyqaralyq kórmesi aıasynda ótkizilgeli jatqan Shanhaı yntymaqtastyq uıymynyń marafonyn qoldaý maqsatynda jastarmen flesh-mob ótkizdi. Sharaǵa Olımpıada chempıondary Baqtııar Artaev pen Danııal Eleýsinov qatysty, dep habarlaıdy «QazAqparat» HAA tilshisi.

Mınıstr flesh-mob aıasynda Olımpıada chempıondary bastaǵan bir top jastarmen qysqa qashyqtyqty júgirip ótti. Sondaı-aq, júgiris aıaǵyna jetkennen keıin jınalǵandardyń barlyǵy «Biz Astana halyqaralyq ShYU marafonyn qoldaımyz» dep urandatty. BAQ ókilderine shaǵyn suhbat bergen mınıstr barlyq nıet bildirýshilerdi marafonǵa qatysýǵa shaqyrdy.
 

«27 tamyzda Astanada tuńǵysh halyqaralyq marafon ótkizemiz. Sol jarysqa qatysyńyzdar, jeńiske jetińizder. Qatysýǵa tilek bildirgender óte kóp. Ásirese, sheteldikterdiń qyzyǵýshylyǵy joǵary. Nege deseńizder, dúnıejúzindegi eń aldyńǵy qatarly telearnalar men BAQ kózderi bizdiń marafondy kórsetedi. Astanalyqtar úshin yńǵaısyzdyq týyndatýy múmkin. Biraq, Elordanyń kórkin osylaı álemge pash ete bilýimiz kerek», - deıdi mınıstr.
 

Halyqaralyq dárejede ataǵy bar kimderdiń qatysatyny týraly suraqtyń jaýabyn mınıstr keıinge qaldyrdy.
 

«Bul ázirge qupııa bolyp qala tursyn. Biraq, aıtarym - halyqaralyq marafonnyń eń tanymal sportshylary bizdiń de marafonǵa atsalysatyn bolady», - deıdi Arystanbek Muhamedıuly.

Eske sala ketsek, ShYU-nyń marafony elordada 27 tamyz kúni tańerteń saǵat 07:30 ýaqytynda bastalady. Oǵan bes myńǵa jýyq adam qatysady dep kútilip otyr.