Arystanbek Muhamedıuly: 1-2 jylda qazaq kınosy halyqaralyq deńgeıge shyǵady
Astanada ótip jatqan QR Mádenıet jáne sport mınıstrliginiń keńeıtilgen alqa májilisinde Arystanbek Muhamedıuly óz basqarýyndaǵy vedomstvo ulttyq kınonyń damýyna erekshe kóńil bólip kele jatqanyn atap ótti.
«Memleket basshysy Qazaqstan tarıhyndaǵy alǵashqy «Kınematografııa týraly» zańǵa qol qoıdy. Kınoqaýymdastyq úshin jáne qazaqstandyqtar úshin bul tarıhı oqıǵa boldy. Biz barlyq progressıvti álemde kınoóner - qoǵamnyń damýyna jáne qoǵamdyq sananyń qalyptasýyna yqpal ete otyryp, orasan zor áleýmettik jáne ıdeologııalyq áserge ıe ekenin jaqsy túsinemiz. Ekinshiden, qazaqstandyq kınony jappaı prokatta ilgeriletýge járdemdesetin jáne onyń sheteldik fılmder aldynda basymdyǵyn qamtamasyz etetin jáne úshinshiden, ulttyq kınoǵa álemdik kınoǵa shyǵýǵa múmkindik beretin zań qabyldandy», - dedi mınıstr.
Arystanbek Muhamedıuly óz baıandamasynda áleýmettik jelide taraǵan aqparattardan da habardar ekenin bildirdi.
«Bizde zańdy oqymaǵan keıbir azamattar bıik minberden sóz sóılep, qaljyńmen shabýyl jasaǵysy keledi. Al shyntýaıtyna kelgende bul zań - biregeı. Men sizderge senimdi túrde 1-2 jyldan keıin qazaq kınosy halyqaralyq deńgeıde jarqyraıtynyn aıtqym keledi. Sebebi, bul zań barda, bizdiń keremet rejısserlerimiz ben akterlerimiz barda myqty týyndylar ómirge keleri anyq», - deıdi mınıstr.
Arystanbek Muhamedıuly jańa zań boıynsha ulttyq kınolarǵa mańyz beriletinin atap ótti.
«Bizdiń ulttyq kıno 12 paıyzdyq qosymsha qunǵa salynatyn salyqtan bosatylady. Kıno túsirip júrgender mundaı jeńildiktiń mańyzyn biledi. Biz zańda Frantsııa, AQSh, Reseı men Qytaı, Ońtústik Koreıa sekildi kınoóndirisi damyǵan elderdiń tájirıbesin negizge aldyq», - dedi Arystanbek Muhamedıuly.