Arystan 145 bala Býrabaıdaǵy demalys lagerlerine keldi

KÓKShETAÝ. QazAqparat - Tótenshe jaǵdaı oryn alǵan Arys qalasynan 145 bala Býrabaıdaǵy demalys lagerlerine kelip jetti, dep habarlaıdy QazAqparat tilshisi.

Búgin Shýche temirjol vokzaly perronynan olardy Aqmola oblysy ákiminiń orynbasary Aına Mysyrəlimova, oblystyq bilim basqarmasy men BAQ ókilderi qarsy aldy. Tótenshe jaǵdaı oryn alǵan Arystan jetken 145 bala birneshe topqa bólinip, Býrabaıdaǵy «Zvezdnyı» balalardy saýyqtyrý ortalyǵy men «Samuryq» lagerine jaıǵastyryldy.

Aqmola oblysy bilim basqarmasy basshysynyń orynbasary Botakóz Dúısenovanyń aıtýynsha, bul - Arystan kelip otyrǵan balalardyń alǵashqy legi. Jalpy, 500-den astam balany Aqmola oblysyndaǵy demalys lageri men saýyqtyrý ortalyqtarynda demaldyrý josparlansa, jaqyn kúnderi taǵy 100 bala keledi dep kútilýde.

«Shildeniń 12-de Arys qalasynan taǵy 100 jetkinshek keledi. Olar Shalqardaǵy Aqmola oblysynyń bilim basqarmasyna tıesili «Chaıka» jáne «Sokol» balalardy saýyqtyrý ortalyqtarynda demalatyn bolady. Budan bólek, tamyz aıynda Zerendi aýdanyndaǵy demalys lagerlerinde 145 bala jáne «Baldáýren» respýblıkalyq oqý-saýyqtyrý ortalyǵynda 150 balany qabylaıtyn bolamyz», - deıdi Botakóz Dúısenova.

Sonymen qatar, arystyq balalar úshin Aqmola oblysynyń kıeli jerleri men Býrabaıdyń kórikti saıahat uıymdastyrylady. Oǵan qosa, túrli mádenı, sporttyq sharalar qarastyrylyp otyr.

«Shynymdy aıtsam, Býrabaıǵa kelgenime óte qýanyshtymyn. Jasyl qaraǵaıy men qaıyńy, móldir kólderi kóz tartady. Tabıǵaty óte ásem. Býrabaıdyń sulý tabıǵatyn kórý - armanym edi», - dep óziniń alǵashqy kúngi áserimen bólisti Arys qalasyndaǵy Álibı Jangeldın atyndaǵy orta mekteptiń 8-synyp oqýshysy Bekbolat Orynbaı.

Arystaǵy qarý-jaraq qoımasynda bolǵan alapat jarylys bútin bir qalanyń turǵyndaryna úreı týǵyzǵanymen, el bolyp kórsetilgen kómek pen qoldaýdyń arqasynda qorqynysh artta qalǵanyn ańǵarýǵa bolady.

«Jarylys bolǵan kúni barlyǵymyz úıde boldyq. Gúrs etken dybysty biz jaı ǵana jarylys dep oıladyq. Keıin snarıadtar daýysy údeıi túsken soń jaǵdaıyn nasyrǵa shapqanyn sezdik. Sol kezde ata-anamyz ápkem jáne inim úsheýimizdi ertip Montaıdaǵy tanystarynyń úıine alyp bardy. Keshkisin Shymkentke jetip, sondaǵy týystarymyzdyń úıin panaladyq. Bastapqy da árıne, qorqynysh boldy. Jedel kórsetilgen kómek, qoldaýdyń arqasynda qorqynyshtyń barlyǵy artta qaldy», - deıdi Arys qalasyndaǵy №1 orta mekteptiń 10-synyp oqýshysy Ásel Eskermes.

Aıta keteıik, balalarǵa demeýshilerdiń esebinen satyp alynǵan kıim-keshek pen sómkeler úlestirildi.