Arystaǵy jedel shtab qalaı jumys istep jatyr

ARYS. QazAqparat - Qazirgi tańda Túrkistan oblysynyń ákimi Ómirzaq Shókeevtiń bastamasymen Arys qalasyndaǵy tótenshe jaǵdaıǵa baılanysty Ordabasy aýdany Aqjol aýylynda ornalasqan Jambyl atyndaǵy mektepte arnaıy shtab jumys isteýde, dep habarlaıdy QazAqparat tilshisi.

Negizgi maqsat - bir ortalyqtan shtabtyń jumysyn úılestirý, Arys qalasy boıynsha atqarylǵan jumystardy josparlaý. Shtabta qazir QR Qorǵanys mınıstri N.Ermekbaev, oblys ákimi Ó.Shókeev, oblys prokýrory N.Ábdirov, aýdan, departament, basqarma basshylary bar. Sondaı-aq, polıtsııa, qorǵanys, BAQ qyzmetkerlerinen quralǵan top táýlik boıy shtabta jumys isteýde.

24 maýsymda Arys qalasyndaǵy 3 orynda jınalý pýnktteri ashylǵan bolatyn. Aqdala, 41 razezd jáne Vodozabor dep atalatyn aýmaqtarǵa jınalǵan turǵyndardy áskerı kólikter men avtobýstar qaýipsiz aımaqtarǵa kóshirip úlgerdi. Jalpy sany evakýatsııalaý jumystaryna 100-den astam kólik jumyldyrylyp otyr.

Qala aýmaǵyn táýlik boıy ulttyq gvardııanyń 580 sarbazy men 345 polıtsııa qyzmetkeri kúzetýde.