Arystaǵy jarylysqa kináliler zań aıasynda qatań jazalanady - QR Prezıdenti
Baspasóz málimetterine qaraǵanda, Memleket basshysy tótenshe jaǵdaı bolǵan aımaqtan kóshirilgen turǵyndardy ornalastyrý boıynsha atqarylyp jatqan jumystardyń barysymen tanysty.
Prezıdent qaýipsiz jerlerge kóshirilgen Arys qalasynyń turǵyndaryn ystyq tamaqpen, medıtsınalyq járdemmen qamtamasyz etip, basqa da barlyq qajetti kómek kórsetýdi tapsyrdy.
Qasym-Jomart Toqaev azamattardyń qaýipsizdigi men olardyń dúnıe-múlikteriniń saqtalýyn baqylaýda ustaý qajettigin eskertti. Memleket basshysy Іshki ister mınıstrligine, ásirese balalarǵa erekshe kóńil bólýdi tapsyrdy.
- Osy tártippen jumysty jalǵastyryńyzdar. Úkimetke qalaǵa jáne onyń turǵyndaryna kómektesý týraly tapsyrma berildi. Qazir biz eń birinshi kezekte adamdardyń, qala turǵyndarynyń qaýipsizdigin qamtamasyz etýimiz kerek. Ekinshi - kórsetiletin kómekter. Arnaıy qor quryldy. Arysqa búkil Qazaqstan kómektesedi. Men halyqpen jumys istep jatqan qalanyń jurtshylyǵyna, ardagerlerge rızashylyǵymdy bildiremin. Jarylystyń sebepterin anyqtaý qajet. Qylmystyq is qozǵaldy, tergeý-tekserý bastaldy. Eger kináliler bolsa, olar zańmen qatań jazalanady. Aldaǵy ýaqytta Arys jarylǵysh qurylǵylardyń barlyǵynan tazartylýy tıis, - dedi Qazaqstan Prezıdenti.
Qasym-Jomart Toqaev órt pen oq-dárilerdiń jarylys bolǵan jerlerdi qalpyna keltirý jóninde birqatar naqty tapsyrmalar berdi.