Arystaǵy jarylys saldarynan adasqan balalardy qaıdan izdeýge bolady
Bul týraly Túrkistan oblysynyń ákimi Ómirzaq Shókeev Arys qalasynda tikeleı efırde ótken baspasóz brıfınginde aıtty.
«Tek sońǵy bir saǵatta 1616 adam evakýatsııalandy. Árıne, ata-anasynan kóz jazyp qalǵan kishkentaı balalar bar. Barlyq jınaý bólimderi boıynsha, Shymkenttiń barlyq aýdandarynda arnaıy jumys tártibin uıymdastyrdyq. Adasqan balalardyń fotosýreti Túrkistan oblysy ákimdiginiń resmı saıtyna salynyp otyrady. Bul arqyly balasymen qaýyshyp jatqandar bar. Bul jumystardy jalǵastyramyz», - dedi ákim.
Eske salaıyq, búgin tańerteń Túrkistan oblysynyń Arys qalasyndaǵy áskerı bólim qoımasynda jarylys boldy. Birneshe óńirdiń Tótenshe jaǵdaılar departamenti shuǵyl jeliler qurdy. Kóp uzamaı oblys basshysy Ómirzaq Shókeev bastaǵan arnaıy komıssııa Arystaǵy áskerı bólimge attandy.Jaǵdaıdyń aýqymymen tanysqan óńir ákimi Arys turǵyndaryn evakýatsııalaý týraly sheshim qabyldanǵanyn málim etti. QR ІІM Tótenshe jaǵdaılar komıteti turǵyndar qaıda jáne qalaı evakýatsııalanyp jatqanyn habarlady.
QR Prezıdenti Qasym-Jomart Toqaev tıisti organdarǵa Arystaǵy tótenshe jaǵdaıdyń zardaptaryn joıý týraly tapsyrma berdi.
QR Qorǵanys mınıstrligi resmı aqparat taratyp, túske deıingi ýaqyttaǵy jaǵdaı boıynsha zardap shekkender joqtyǵyn aıtty. Keıin habarlanǵandaı, oqıǵa ornyna Qorǵanys mınıstri Nurlan Ermekbaev ushyp shyqty.
Oqıǵa saldarynan zardap shekken 11 adam Shymkent aýrýhanasyna jetkizildi.
Túrkistan oblysynyń aýrýhanalaryna 31 adam tústi.