Arystaǵy jarylys saldaryn joıýǵa qaı elder kómektesti
Bul týraly Qorǵanys mınıstriniń orynbasary Tımýr Dándibaev ortalyq kommýnıkatsııalar qyzmetinde ótip jatqan baspasóz máslıhatynda aıtty.
«Shynymen de bizdiń áriptester Arys qalasyndaǵy oqıǵadan keıin úlken kómek kórsetti. Bárinen buryn Reseı Federatsııasy men Tájikstan Respýblıkasynyń birden baılanysqa shyǵyp, óz mamandaryn konsýltatıvtik kómek kórsetýge jiberdi. Sondaı-aq, AQSh Qorǵanys mınıstrliginiń mamandary da baǵa jetpeıtin úlken jumys atqardy. Qarýly kúshterdiń mınadan tazartý ortalyǵyna aqysyz negizde saperlik qurylǵylar, oqý-jattyǵý keskinderin, ózge de qurylǵylar men qondyrǵylar berdi. Ol quraldar búginge deıin mamandardy daıyndaýǵa qoldanylyp júr. Odan bólek konsýltatıvtik sıpatta úlken kómek kórsetti. Naqty aıtsaq, tótenshe jaǵdaı saldaryn joıýǵa tartylǵan bizdiń saperler men mamandardyń áreketin baǵalaý boıynsha kómektesti», - dedi mınıstrdiń orynbasary.
Aqysyz negizde qondyrǵy berý jaǵynan Úndistan men Birikken Arab Ámirlikteri de tartynyp qalmaǵan.
«Birikken Arab Ámirlikteri 43 mln teńgeden astam qarajatqa qondyrǵylar berdi. Úndistannyń qorǵanys vedomstvosy aqysyz negizde jarylystan qorǵaıtyn kostıýmder berdi. Bul kómekterdiń bári qajettiligi boıynsha baǵyttaldy. Sheteldik mamandar bizdiń mamandardyń tótenshe jaǵdaı saldaryn joıý jáne oǵan deıingi kezeńde atqarǵan áreketteri men sheshimderin joǵary baǵalaǵanyn aıtqym keledi», - dedi Tımýr Dándibaev.