Arystaǵy oqıǵaǵa baılanysty poıyzdar kestelerinen keshigýde

ARYS. QazAqparat - Túrkistan oblysy Arys qalasynda bolǵan oqıǵaǵa baılanysty «Jolaýshylar tasymaly» AQ «Shymkent -Arys -Temir» jol ýchaskesinde poıyzdar óz kestesinen keshigip jatqanyn málim etti, dep habarlaıdy QazAqparat.

«QTJ» AQ-ǵa qarasty barlyq mekemeler «Shymkent -Arys -Temir» jol torabynda qatynaıtyn barsha jolaýshylar poıyzdarynyń qaýipsizdigi úshin aldyn ala sharalar ótkizýde. Poıyzdardyń keshigýi týraly aqparat sáıkesinshe vokzal ǵımarattarynda berilýde. Sondaı-aq barsha aqparatty «105» biryńǵaı qońyraý ortalyǵy arqyly da bile alasyzdar», - delingen QTJ aqparatynda.

Eske salaıyq, búgin tańerteń Túrkistan oblysynyń Arys qalasyndaǵy áskerı bólim qoımasynda jarylys boldy. Birneshe óńirdiń Tótenshe jaǵdaılar departamenti shuǵyl jeliler qurdy. Kóp uzamaı oblys basshysy Ómirzaq Shókeev bastaǵan arnaıy komıssııa Arystaǵy áskerı bólimge attandy. Jaǵdaıdyń aýqymymen tanysqan óńir ákimi Arys turǵyndaryn evakýatsııalaý týraly sheshim qabyldanǵanyn málim etti. QR ІІM Tótenshe jaǵdaılar komıteti turǵyndar qaıda jáne qalaı evakýatsııalanyp jatqanyn habarlady.

QR Prezıdenti Qasym-Jomart Toqaev tıisti organdarǵa Arystaǵy tótenshe jaǵdaıdyń zardaptaryn joıý týraly tapsyrma berdi.

QR Qorǵanys mınıstrligi resmı aqparat taratyp, túske deıingi ýaqyttaǵy jaǵdaı boıynsha zardap shekkender joqtyǵyn aıtty. Keıin habarlanǵandaı, oqıǵa ornyna Qorǵanys mınıstri Nurlan Ermekbaev ushyp shyqty.