Arystaǵy qurylys jumystaryna belsene aralasqandar marapattaldy

ARYS. QazAqparat - Arys qalasyn qalpyna keltirý jumystary 17 sektorǵa bólinip, oblys pen aýdandarǵa tapsyrylǵan bolatyn, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Sonyń biri Atyraý oblysy men Jetisaı aýdanyna qarasty №1-sektor. Qazirgi tańda atalǵan aýmaqta qurylys ári jóndeý jumystary aıaqtalýǵa jaqyn. Osyǵan oraı, búgin Arys qalasyndaǵy qurylys jumystaryna belsene aralasqan qurylysshylar, eriktiler, sondaı-aq, Atyraý oblysy men Jetisaı aýdany ákimdiginiń qyzmetkerleri arnaıy alǵys hattarmen marapattaldy. Sektor aýmaǵynda turatyn arystyq jergilikti turǵyndarǵa arnalyp merekelik kontsert uıymdastyrylyp, dastarqan jaıyldy.

Aıta keterligi, №1-sektor Kóktem shaǵyn aýdanynda ornalasqan. Aýmaqqa qarasty 571 úıdiń 468-i jóndeýden ótken. Onyń ishinde 55 úı tolyqtaı turǵyzylyp otyr. Budan bólek, 11 kásipkerlik nysan jóndelgen. Qurylysty barlyǵy 13 merdiger kompanııa júrgizdi. Jalpy qurylysqa 700-ge jýyq qurylysshy men 12 tehnıka jumyldyrylǵan.