Arystaǵy qoımada radıoaktıvti oq-dáriler bolǵan joq - Qorǵanys mınıstrligi

NUR-SULTAN. QazAqparat - Arysta jarylǵan qoımada qandaı oq-dáriler saqtalǵanyn Ortalyq kommýnıkatsııalar qyzmetinde ótken baspasóz máslıhatynda Qorǵanys mınıstriniń orynbasary Tımýr Dandybaev aıtyp berdi, dep habarlaıdy QazAqparat tilshisi.

«Arystaǵy qoımada radıoaktıvti elementi bar oq-dáriler bolǵan joq. Onda zymyrandy-artıllerııalyq qarýlardyń oq-dárileri, ınjenerlik oq-dáriler, sonymen birge atys qarýlarynyń patrondary, qol granatalary, tankke qarsy basqarylatyn zymyrandar, zenıtti basqarylatyn zymyrandar, ártúrli kalıbrdegi strategııalyq júıelerge arnalǵan snarıadtar, pırotehnıkalyq zattar men strategııalyq komplektti elementter bolǵan. Ol jerde eshqandaı radıoaktıvti elementtiń bolmaǵanyn habarlaımyz», - dedi Tımýr Dandybaev.

Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Buǵan deıin úsh adam qaza tapty. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.

Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi.

Búgingi Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletinin aıtty.

Evakýatsııalaý kezinde myńnan astam ata-ana balarynan kóz jazyp qaldy. Qazirgi ýaqytta olardyń barlyǵy da balalarymen qaýyshty, barlyǵy din-aman.

Fakti boıynsha qylmystyq is qozǵady.

Qaladaǵy tótenshe jaǵdaı jolaýshylar poıyzdarynyń kestesine de áser etti.

25 maýsym, saǵat 12.00-degi jaǵdaı boıynsha áskerı bólim aýmaǵynda jarylystar toqtady. Degenmen, oq-dáriler saqtalatyn qoımalardyń aýmaǵynda byqsyǵan ottyń oshaqtary baıqalǵandyqtan, QR Іshki ister mınıstrligi jarylystardyń qaıtalaný qaýpi saqtalyp otyrǵanyn eskertti.

Osy ýaqytta QR Qorǵanys mınıstrliginiń áskerı-ınjenerlik qyzmetshileri Arys qalasyn mınadan tazalaý jumystaryn júrgizip jatyr. Snarıadtardyń deni turǵyn úı alqaptaryna túsken.

Arys turǵyndaryna kómek qolyn sozý maqsatynda elimizde «Arys, biz birgemiz» aktsııasy bastaý aldy.