Arystaǵy kópqabatty úılerdiń shatyry men syrtqy kórinisi birkelki bolýy kerek - ákim
Óńir basshysy qysqa merzimde Arys qalasyn qalpyna keltirý, turǵyndarǵa jaǵdaı jasaý baǵytyndaǵy barlyq máseleni talqylap, osy jaýapty mindetti otanshyldyqpen, janashyrlyqpen atqarý kerektigin aıtty. Halyqtyń muqtajyn jedel sheshý kerektigin atap ótti. Árbir sektordyń jumysyn óńir ákimderiniń jáne aýdan, qala ákimderiniń orynbasarlary jáne Arys qalasynan bir jaýapty ókil, jalpy sany 51 adam úılestiretin boldy. Jeke-jeke shtab quryp, úı qurylysy, gýmanıtarlyq kómek taratý, qaýipsizdikti saqtaý, qalany tazartý, turǵyndardy aqparattandyrý jáne ózge de máseleler boıynsha kún saıyn málimet berip otyrady dep josparlandy.
Apparat májilisinde ShQO, Atyraý, Qaraǵandy, Jambyl, Mańǵystaý oblystary jáne Nur-Sultan qalasy ákiminiń orynbasarlary men jaýapty ókilderiniń málimetteri tyńdaldy. «Samuryq-Qazyna» ál-aýqat qory men «Atameken» ulttyq kásipkerler palatasynyń jaýapty ókilderi de ózderine tapsyrylǵan jumystardyń barysy týraly baıandady. Aýdan ákimderiniń orynbasarlary da ózderine júktelgen aýmaq boıynsha esep berdi.
Búginde Arys qalasyndaǵy úılerdi tekserý, qurylys nysandarynyń jobalyq-smetalyq qunyn esepteý jumystary júrgizilip jatyr. Keı úılerdiń terezeleri aýystyryla bastaǵan. Barlyq sektor boıynsha úılerdi tekserý, akt toltyrý jumystary aıaqtalýǵa jaqyn. Merdigerler anyqtalyp, qurylys brıgadalary jasaqtalǵan.
Oblys ákimi Ómirzaq Shókeev qaladaǵy kópqabatty úılerdiń shatyry, syrtqy kórinisi jınaqy ári birkelki bolý kerektigin eskertti. Azyq-túlik úlestirý jáne ózge de jumystardy úılestirýge jergilikti belsendi turǵyndardy tartýdy tapsyrdy. Sonymen birge jıynda qalany aýyz sýmen, elektr qýatymen úzdiksiz qamtý, balalardy demalys oryndaryna jiberý, órt qaýipsizdigin saqtaý, ataýly áleýmettik kómekterdi ýaqtyly aýdarý máseleleri de talqylanyp, naqty josparlar jasaldy.