Arystaǵy egistik alqaptarynan oq-dári qaldyqtary tabyldy
«Qulaǵan oq-dári izi tabylǵan jaǵdaıda, shuńqyrda oq-dári qaldyqtarynyń bar-joǵy tekseriledi. Mundaıda 5 metrge deıingi tereńdikti qamtı alatyn bomba izdeý quraly qoldanylady. Olar óziniń tıimdiligin kórsetti. Egistik alqaptaryn tekserý barysynda 1,5 metrden 3 metrge deıin jerge kirip ketken 200-den astam oq-dári qaldyǵy tabylyp, alyndy», - dedi Qorǵanys mınıstriniń orynbasary.
Onyń atap ótýinshe, qaýipsizdik sharalaryn saqtaý jáne jarylý qaýpi bar qaldyqtardy joıý barysynda oq-dárini arnaıy shuńqyrǵa qoıý jumystary aıryqsha saqtyqpen júrgiziledi. Bul, olardyń jan-jaqqa ushýyna jol bermeý maqsatynda jasalady. Buǵan qosa, jarý jumystaryn júrgizetin toptyń komandıri jarylǵysh zattardyń zarıad qýatyn naqty eseptep, olardy durys ornatýy qajet.
«Jarylý qaýpi bar qaldyqtarmen jumystar kezinde saperler qorǵanys kostıýmynyń «Sokol» jáne «Saqtaý» syndy jeńil úlgilerin, sonymen qatar «Saýyt» syndy aýyr úlgilerin kıedi. Oq-dárilerdiń jarylý qaýpi bar qaldyqtary jol talǵamaıtyn úshóstik bortty avtomobıldermen tasymaldanady. Olar júrgizýshini tosyn jarylystan qorǵaı alady», - dedi Baqyt Qurmanbaev.
Eske sala ketsek, Arys qalasyndaǵy áskerı bólimniń qoımasynda 2019 jyly 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskerı qyzmetshi. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi.
Foto ıllıýstratıvnoe: 123ru.net