Arystaǵy balalar úıiniń tárbıelenýshileri Moldovada júr
Búldirshinder saıahaty aıasynda eldiń jáne óńirdiń tarıhı-geografııalyq, sondaı-aq etno-mádenı erekshelikterin zertteý josparlanǵan.
Qazaqstandyq jasóspirimderdiń dúnıetanymyn keńeıtip, rýhanı baıytýǵa yqpal etetin osy ispettes semınardy oqý jylynyń basynda ótkizý bastamasyn Syrtqy ister mınıstrliginiń «Nur Otan» bastaýysh partııa uıymynyń úılestirýimen Qazaqstannyń Kıshınev qalasyndaǵy Bas konsýldyǵy kótergen.
Bastama avtorlarynyń qaıyrymdylyq aktsııasyna demeýshilik bildirý usynysyn «KMG International» kompanııasynyń bólimsheleri: «Rompetrol Moldova», «KAZROM FLOUR» JShS, «Cricova-vin» jáne «SupremaLex» kompanııalary kóterdi.
Bas konsýldyq pen «Rompetrol Moldova» kompanııasynyń ókilderi týr qatysýshylaryn Kıshınevtiń halyqaralyq áýejaıynda qarsy alyp, uzaq jolǵa qaramastan, birden qalalyq týrdy bastady.
Keıinirek, balalar jańa pisken jemister men kókónisterge baı ulttyq taǵamdardan dám tatyp, jergilikti salt-dástúrler týraly tyńdap, qazaqstandyq ómir saltynan erekshelikteri jaıynda óz pikirlerimen bólisti.
Bolashaqta estrada juldyzy bolýdy armandaıtyn Oralbek Júsipov sapar týraly úlken ásermen áńgimeleıdi. «Biz úshin, árıne, Moldavııaǵa shaqyrylǵanymyz týraly habar kútpegen jerden keldi. Estigen kúnnen bastap biz ushaqqa otyrýdy asyǵa kúttik. Jol óte jaqsy ótti, ushaq qonǵan kezde biz qalany terezelerden azdap kóre aldyq. Biz áýejaıdan shyqqan kezde aýa-raıy tamasha boldy. Maǵan Moldovanyń ulttyq mýzykasy óte unady. Men onymen bolashaqta jaqynyraq tanysamyn degen úmittemin, múmkin bir ánin úırenip alarmyn. Men bul sapardan kóp nárseni kútemin», - deıdi Oralbek.
Áńgime barysynda balalar ózderiniń ómirleri men bolashaq josparlary týraly yqylaspen aıtty. Olar eresek ómirge optımıstik kózqaraspen qarap, tańdaǵan mamandyqtary boıynsha joǵary maman ıesi bolýdy armandaıdy. Mysaly, Tolǵanaı Masalıeva matematıka pániniń muǵalimi bolýdy josparlaǵan, al Beksultan Álibek Qazaqstan Respýblıkasy Ulttyq qaýipsizdik komıtetiniń áskerı qyzmetkeriniń jolyn tańdaǵan.
Belgili hırýrg bolýdy armandaǵan Karına Sýlaımanova shetelge alǵashqy sapary jaıly este qalǵan sátteri týraly baıandap berdi. «Moldova bizge óte unady – klımaty sondaı jyly, aýa da taza. Kıshınevtiń ózi óte jasyl jáne ádemi qala eken. Biz osy eldiń tarıhy týraly, onyń halqy týraly múmkindiginshe kóp bilgimiz keledi, olarǵa bizdiń Qazaqstan týraly aıtyp bergimiz keledi», - deıdi kishkentaı Karına.
«Men bizdiń búldirshinderimiz úshin óte qýanyshtymyn. Olardyń baqytty, shabyttanǵan júzderin, sapardan, ózderine degen yqylastan, eresekterdiń jyly lebizi men meıirimine bólengennen úlken áser alǵanyn kórý men úshin úlken qýanysh. Bul sapar bizdiń oqýshylarymyzdyń ǵana emes, sonymen birge osy jazda úlken synaqty bastan keshken Arys qalasynyń barlyq turǵyndarynyń júregine jol tabatynyna senimdimin», - deıdi balalar úıiniń dırektory Merýert Súıindikova.
«Bizdi qoldaǵan barlyq qazaqstandyqtarǵa alǵysymyz sheksiz. Moldavııaǵa balalarǵa arnalǵan týr uıymdastyrýǵa kómektesken Qazaqstannyń Bas konsýldyǵyna, Syrtqy ister mınıstrligine jáne«Nur Otan» partııasyna erekshe alǵys bildirgim keledi», - dep qosty M.Súıindikova.
13 qyrkúıekke deıin jalǵasatyn saıahat barysynda arystyq jetkinshekter Moldavııanyń murajaılaryn, mádenı jáne tarıhı ortalyqtaryn, akvaparkti, oıyn-saýyq ortalyqtaryn, Eýro-2020 irikteý kezeńinde oınaıtyn Moldova-Túrkııa fýtbol matchyn kórýdi jáne Qara teńizge barýdy josparlap otyr.
Dúısenbi kúni balalar Moldovanyń ońtústigindegi Gagaýzııa avtonomııalyq-terrıtorııalyq bóliginiń astanasy Komrattaǵy Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń músini ornalasqan Dańq alleıasyna bardy jáne onyń aýmaǵyndaǵy ózge de belgili nysandarda boldy.