Arystaǵy apat: Jolda qalǵan 11 myń jolaýshy balama baǵyttarmen tasymaldandy
Temirjol kompanııasyna qarasty «Jolaýshylar tasymaly» AQ baspasóz hatshysy Dıas Ahmetsháriptiń aıtýynsha, 2 kúnniń ishinde Túrkistan oblysynyń aýmaǵynda joldan qalǵan 11 myń jolaýshy balama baǵyttar men avtokólik arqyly tasymaldanǵan.
Joldan qalǵan jolaýshylarǵa qolaıly jaǵdaı týǵyzýǵa Túrkistan oblysymen qatar kórshiles Jambyl oblysynyń atqarýshy organdary da kómektesýde.
«Arystaǵy tótenshe jaǵdaıǵa baılanysty Shymkent-Arys-Túrkistan baǵyty boıynsha barlyq poıyzdar toqtatylǵanyn bilesizder. Osyǵan baılanysty 13 jolaýshy poıyzy «Jezqazǵan-Jaryq» úzigi arqyly ótken. Búginnen bastap jańa baǵyt túzildi. 10 jolaýşy poıyzy «Jesqazǵan- Sekseýil» baǵyty arqyly ketip jatyr. Sonymen qatar Shymkent-Túrkistan qalalarynyń arasyna avtokólikter tasymaldap qatynap tur. Bul iste Túrkistan, Jambyl oblysy men Shymkent qalasynyń ákimdigi birlesip kómektesýde. Eki kúnde 11 myń jolaýshy tasymaldandy. Onyń eki myńy avtokólik arqyly jaıly orynǵa jetkizildi», - degen Dıas Ahmetshárip balama baǵyttarmen joldy jalǵastyrýǵa 11 myń jolaýshynyń jartysynan astamy keliskenin aıtady.
«Jolaýshylar tasymaly» AQ-nyń Servıs jáne klıenttermen jumys departementiniń dırektory Álibek Sultanov joldy jalǵastyrýdan bas tartqandardyń barlyǵyna bılet quny 100 paıyz qaıtarylyp jatqanyn aıtady.
«Bas tartqan jaǵdaıda bılet qunynyń 100 paıyzyn ótep beremiz. Bul jaǵynan eshqandaı másele joq. Tótenshe jaǵdaı kesirinen jospary buzylyp, joldan qalǵany úshin renish bildirgender de bar. Biraq olardyń sany saýsaqpen sanarlyq», - deıdi ulttyq kompanııa ókili.
Eske salsaq, buǵan deıin Arystaǵy jarylystan úshinshi adamnyń qaıtys bolǵany habarlanǵan bolatyn.
Búgin Parlament depýtattary Arys turǵyndarymen kezdesý úshin Túrkistan oblysyna attandy.
Tótenshe jaǵdaıdyń qaýpi áli seıilmegendikten, turǵyndarǵa qalaǵa oralýǵa bolmaıtyndyǵy eskertilgen