Arystaǵy apat: Táýlik ishinde astanalyqtardan 100-den astam qońyraý tústi
Tótenshe jaǵdaılar departamentiniń habarlaýynsha, elordadaǵy shuǵyl jeli 24 maýsym kúni saǵat 11.00-den bastap jumys istep tur.
«Nur-Sultan qalasynda táýlik boıy psıhologtardy tarta otyryp shuǵyl jeli uıymdastyryldy. Tótenshe jaǵdaılar departamenti turǵyndardy sabyr saqtap, úreıge jol bermeýge shaqyrady. Alańdatqan suraqtar boıynsha shuǵyl jeliniń 8(7172) 24-51-71, 24-52-15, 24-51-47 nómirlerine habarlasýǵa bolady», - delingen departament dereginde.
Resmı aqparatqa qaraǵanda elorda turǵyndarynan túsken qońyrýlardyń sıpatyn birneshe saýalǵa bólip toptastyrýǵa bolady. Turǵyndardyń bir bóligi tótenshe jaǵdaıdyń barysy men aýqymy qandaı ekenin bilý úshin habarlassa, endi biri apat aýmaǵynda qalǵan qart adamdar, kámeletke tolmaǵan balalar, tasymaldaýǵa kelmeıtin naýqastar men múgedekterdiń bar-joǵyn bilgisi kelgen. Ata-anasynan ajyrap qalǵan balalardy evakýtsııalaǵan beketterdiń mekenjaıyna baılanysty da ondaǵan saýaldar qoıylyp, shuǵyl jeli mamandary jaýap bergen.
Eske salsaq, Arys qalasyndaǵy áskerı bólimniń qoımasynda keshe tańerteń jarylys bolǵandyǵy týraly habarlaǵan bolatynbyz. Jarylystan eki adam mert boldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.