Arystaǵy apat saldarynan 20 jolaýshylar poıyzy toqtap tur
«Jedel shtab qurylyp, arnaıy rejımde jumys isteýde. 7 iri stansada- Shymkent, Túrkistan, Túlkibas, Taraz, Shý, Shıeli, Qyzylodada 20 jolaýshylar poıyzy toqtatylyp, 8121 jolaýshyǵa jaǵdaı jasaldy. Olar vokzal keshenderine kóshirilip, aýyz sý, tamaqpen qamtamasyz etildi. Jolaýshylardyń talaby boıynsha jol júrý aqysy qaıtarylady. Atalǵan barsha vokzaldarda táýlik boıy kezekshilik uıymdastyrylyp, kerekti aqparat taratylýda», - dep atap ótedi ulttyq tasymaldaýshy.
Kompanııa málimetinshe, Túrkistan, Jambyl jáne Qyzylorda oblys ákimdikterimen birige otyryp qala mańyna avtokólikpen 1500 jolaýshy tasymaldandy. Sondaı-aq, Túrkistan -Mańǵystaý, Aqtóbe, Saratov jáne Shymkent-Taraz, Almaty baǵyttaryna jetip alý úshin 2000 jolaýshy avtokólikpen Túrkistannan Shymkentke jetkizildi. Qyzylorda-Sekseýil arasynda №42 Atyraý-Almaty poıyzynyń 430 jolaýshysyn jetkizý úshin 14 vagon qosymsha tirkeldi.
«Jalpy Taraz, Shymkent, Túrkistan arasynda 8 myńnan astam jolaýshy avtokólikpen tasymaldandy. Ulttyq tasymaldaýshy óz jolaýshylaryna túsinýshilikpen qaraǵanyn jetkizedi. Barsha kerekti aqparatty 105 biryńǵaı anyqtama qyzmetinen ala alasyzdar», - delingen taratylǵan aqparatta.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Apat saldarynan eki adam mert boldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.
Búgingi Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletindigine ýáde berdi.
Jalpy keshegi alasapyran kezde myńdaǵan ata-ana balarynan kóz jazyp qalǵan bolatyn. Qazirgi ýaqytta olardyń barlyǵy da balalarymen qaýyshty, barlyǵy din-aman.