Arystaǵy apat: Qazaqstandyqtar eki kúnde 150 tonna kómek jóneltken

ARYS. QazAqparat - Qazirgi ýaqytta Arys turǵyndaryna qazaqstandyqtar jóneltken gýmanıtarlyq kómektiń kólemi 150 tonnany qurady. Bul jaıynda Túrkistan oblysy ákiminiń keńesshisi Sáken Qalqamanov aıtty, dep habarlaıdy QazAqparat tilshisi.

«Túrkistan oblysynyń ákimdigi Túrkistan oblystyq áleýmettik damý korporatıvtik qorynyń bazasynda Túrkistan men Shymkent ÁKK-lerin, memlekettik mekemelerdi, «Atameken» palatasyn tarta otyryp, evakýatsııalyq pýnkterde ornalasqan Arys qalasynyń turǵyndaryna azyq-túlikpen kómek kórsetý shtabyn qurdy. Aýqymdy qaıyrymdylyq aktsııasy aıasynda oblys ákimdikteriniń, qoǵamdyq birlestikterdiń, túrli qaýymdastyqtardyń, Qazaqstanyń barlyq óńirlerinen qarapaıym turǵyndar men fermerlerdiń tarapynan 150 tonnadan astam balalar taǵamy, kıim-keshek, jeke gıgıenalyq zattar, tósek jabyndylary qor qoımasyna jınaldy», - dep jazdy ol Facebook-te.

Ákimdik málimetinshe, júkter Qaraǵandy, Jambyl, Qyzylorda, Aqtóbe, Batys Qazaqstan, Almaty oblystarynan, Almaty men Shymkent qalarynan jetkizilgen. Qaıyrymdyq kómek áli de úlken kólemde kelip túsip jatyr. Shtabqa 44 ótinish túsip, oǵan sáıkes 50 tonna azyq-túlik pen turmystyq zattar taratylyp berildi.

Buǵan deıin gýmanıtarlyq júkterdi qabyldaý pýnkteri táýlik boıy jumys istep jatqanyn habarlaǵan bolatynbyz.