Arystaǵy apat eń aldymen adamshylyq pen yntymaqty kórsetti - Dáýren Abaev
«Eń aldymen, men Arysta qaza tapqan azamattardyń otbasylaryna qaıǵyryp kóńil aıtqym keledi. Búkil halyq sizdermen birge qaıǵy jamyldy. Túrkistan oblysynyń ákimdigi men Qorǵanys mınıstrligi birden bolǵan oqıǵa týraly habar taratyp otyrdy. Birneshe saǵattyń ishinde jergilikti halyqty evakýatsııalaý boıynsha aýqymdy kampanııa júrgizildi. 15 evakýatsııalyq pýnkt ashylyp, shuǵyl jeli iske qosyldy. Sol kúni Arysqa Prezıdent ushyp bardy. Qazirgi ýaqytta el basshylyǵy aımaqta bolǵan jaıdy tolyǵymen baqylaýynda ustap otyr», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.
Mınıstr «buǵan kim kináli?» degen suraqty bılik tarapy umyt qaldyrmaıtynyn jetkizdi.
«Sondyqtan, bolǵan oqıǵa barynsha zerttelip, onyń sebebi anyqtalady. Sózsiz, bılik beıbit zamanda oq-dáriler qoımasyndaǵy jarylysqa jol berilmeýi kerektigin jaqsy uǵynyp otyr. Biraq, mundaı jaǵdaı bizdiń elde ǵana bolyp jatqan joq. AQSh-ty eske alyńyz. Pensılvanııa shtatynda bir jyl buryn oq-dáriler qoımasynda jarylys bolyp, bir adam qaza taýyp, tórteýi jaralanǵan bolatyn. Ótken jyldyń 10 tamyzynda Solsberı qalasynda áskerı qurylǵylar zaýytynda jarylys bolyp, bir adam kóz jumyp, bir adam qatty jaralanǵan edi. Mundaı mysaldar kóp. Alaıda bul aqtalý emes. Sebep ártúrli bolýy múmkin. Sondyqtan, qandaı da bir sheshim shyǵarýǵa áli erte. Biraq, kináliler jazalanyp, zalaldyń qalpyna keltiriletinin aıtqym keledi. Eń aldymen, halyqqa barlyq qajetti kómek kórsetiledi», - dedi ol.
Dáýren Abaev bul jerde mektep nemese bıznes-ortalyq emes, 45 myń adam turatyn tolyqtaı bir eldi mekenge evakýatsııalaý jumysy júrgizilgenin de eskerý kerektigin atap ótti.
«Jarylys barysynda halyqtyń bir bóligi óndiriste, ekinshisi eginde júrgen. Bireýi úıde, bireýi mektepte bolǵan. Jarylys aıaq astynan boldy. Dese de, jaǵdaıdy retteýge múmkindik týdy», - dedi ol.
Mınıstr óz sózinde «sol kúni benzın Arysta ádeıi qymbattap ketkeni ras pa?» degen suraqqa jaýap berdi.
«Birneshe jaǵdaı bolǵan shyǵar. Biraq olar birli-jarym ǵana. Birli-jarym jaǵdaı úshin bárin kinálaýǵa bolmaıdy. Kóp jaǵdaıda adamdar bir-birine kómektesip, tegin jetkizip tastaýdy usynǵan. Zardap shekkenderdi úıine ornalastyrdy. Jalpy, Arystaǵy tragedııa - eń aldymen adamshylyqty, yntymaqty, bizdiń azamattardyń qıyn kezeńde kómektesýge daıar ekenin kórsetti. Erliktiń qanshamasy kadrdyń syrtynda qaldy. Órt sóndirýshiler óz janyn shúberekke túıip, qıyn jaǵdaıda adamdardy qaýipsiz jergen kóshirdi. Olar jarylyp jatqan snarıadtyń janynda tilsiz jaýmen alysty. Quqyq qorǵaý organdary sol kúngi urlyqtardy tyıdy. Eldegi eriktilerdiń erliginiń ózi nege turady? Bıznesmenderden bastap qarapaıym azamattarǵa deıin - bári de bir kisideı kómek jınady. El degende ezilip, jurt degende jumylý degen osy», - dedi Dáýren Abaev.
Eske sala ketsek, búgin Túrkistan oblysynyń ákimi Ómirzaq Shókeev halyqtyń aldyna shyǵyp, Arys halqy erteńnen, ıaǵnı 27 maýsymnan bastap úılerine qaıta alatynyn málim etken bolatyn.