Arysta jumystardy uıymdastyrýǵa el arasynan shyqqan belsendiler atsalysýda
Beısen Tájibaevtyń aıtýynsha, turǵyndar arasynan árbir 10 úıge 1 belsendi jetekshi saılanyp, elmen tyǵyz qarym-qatynas ornatyla bastaǵan.
«Shtabtarda +40 ystyq pen alatopan shańǵa qaramastan qyzý qarbalas. Arystaǵy 17 sektorǵa bólingen aýmaqtarda tynym taptyrmaıtyn jumystar júrýde. Onyń barlyǵyn shtabqa jetekshilikke kirisken Ulasbek Sádibekovpen aralap, naqty baǵyttardy belgiledik. Árbir oblys pen aýdandar bekitilgen shtabtarda 2 baǵytta iske kiristi. Birinshiden, zardap shekken úılerdi baǵalaý, esepteý qolǵa alyndy. Soǵan saı jóndeletin bolady. Ekinshiden, turǵyndar arasynan árbir 10 úıge 1 belsendi jetekshi saılap, elmen tyǵyz qarym-qatynas jasaýǵa kóshemiz. Bul xalyqtyń osyndaı jaǵdaıda ózin-ózi basqarýyna múmkindik beredi. Eń bastysy ashyqtyqty qamtamasyz etip, eldiń pikirin estip, sheshim qabyldaýǵa tikeleı septigin tıgizedi» delingen paraqshada.
Oblystyq Іshki saıasat jáne din qyzmeti basqarmasynyń basshysy sondaı-aq, el arasynan jetekshi ókilder belgilenip jatqanyn jetkizdi.
«Máselen, Keles aýdany jaýapty N12 sektorǵa 624 otbasy ense, endi solardyń arasynan 62 jetekshi ókil belgilendi. Azyq-túlik taratý, úılerge baǵalaý júrgizý osy jetekshilerdi qatystyra otyryp iske asady. Arys boıynsha 700-deı belsendi ókil belgilenip, jaýapkershilikti arqalap, shtabtarmen birlesken áreketke kóshedi. Árıne, tapsyrylǵan isti tolyq túsinbeı nemese tájirıbesi jetpeı jatqandary da bar. Bastysy jergilikti atqarýshy bıliktiń ókilderi turǵyndarmen til tabysýǵa, týyndaǵan ortaq problemalardy sheshýge umtylýda. Munyń nátıjesin kóretin kún de alys emes», - deıdi Beısen Tájibaev.