Arysta Ulttyq ulannyń sarbazdary qoı, qarý urlaǵan úsh adamdy ustady

ARYS. QazAqparat - Arys qalasynda qoǵamdyq tártip pen qaýipsizdikti damylsyz kúzetip júrgen Ulttyq ulannyń jaýyngerleri urlyq jasady degen kúdikpen úsh adamdy avtokóligimen ustap, travmatıkalyq tapanshamen júrgen bir adamdy toqtatty, dep habarlaıdy QazAqparat tilshisi.

Qazaqstan Respýblıkasy Ulttyq ulany «Ońtústik» óńirlik qolbasshylyǵynyń baspasóz qyzmetinen habarlaǵandaı, túngi patrýlge shyqqan kapıtan Eldos Berdenov jáne qatardaǵy Almat Qulǵarashev ishki ister organynyń qyzmetkerimen birge qalalyq ákimdiktiń mańynda júrgen bireýdi baıqaıdy. Júrisi kúdik týdyrǵan adamdy tekserý barysynda onyń travmatıkalyq tapansha men tórt oqty qoınyna tyǵyp alǵany belgili boldy.

Sondaı-aq, «Arys - Montaıtas» tas joly beketin baqylap turǵan aǵa leıtenant Dýman Kalkeev jáne kishi serjant Ǵalym Baıbatshaev ótip bara jatqan avtokólikti qujattaryn tekserý úshin toqtatady. Tekserý barysynda avtokólik ishindegi adamdar sózderinen jańylyp, aıtqandary bir-birimen sáıkespeı jatty. Qıpaqtap sóılegenderi men is-áreketteri kúdik týdyrǵan azamattardyń mashınasyn teksergen kezde ishinen azyq-túlik, qurylys materıaldary, spırttik ishimdikter, temeki, tiri qoı, mashınanyń dóńgelegi sııaqty zattar shyqqan. Atalǵan zattardyń dúkennen nemese turǵyn úıden urlanýy múmkin ekendigi aıqyn. Kúdikti adamdardy ulandyq sarbazdar birden ustap, ári qaraı tekserý maqsatynda ishki ister organdarynyń qyzmetkerlerine tabys etti.

Aıta ketý kerek, Arys qalasynda Ulttyq ulannyń 500-den astam jaýyngeri qoǵamdyq tártip pen qaýipsizdikti kúzetip jatyr.