Arysta UBT aıaqtaldy
«Iá, ókinishke oraı, qazirgi ýaqytta halqymyzdyń nazary osy qalaǵa aýyp otyr. Onda qaıǵyly oqıǵalar oryn aldy. Arys qalasynda UBT-nyń 1 pýnkti bar. Ol №1 mektepte ornalasqan. Arys boıynsha bizde 2 lek ótti. Birinshisi - 21 maýsym, ekinshisi 23 maýsym kúni boldy. Jalpy ol jerde 779 bala ótinishin qaldyrǵan edi. Onyń 772-si eki lekpen tapsyrdy», - dedi búgin Ortalyq kommýnıkatsııalar qyzmetindegi brıfıngte QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Onyń aıtýynsha, keshe, 24 maýsym kúni saǵat 9.00-de Arys qalasynyń №1 mektebinde apellıatsııalyq komıssııa óz jumysyn bastaǵan. Alaıda áskerı bólimshedegi jarylystardyń saldarynan jumysyn toqtatqan.
«Eshkim zardap shekken joq. Osy qalada mınıstrlik ókildiginiń 12 múshesi jumys istedi. Qazirgi ýaqytta olardyń 12-si de Shymkent qalasynda. 10-y Nur-Sultan qalasyna shyǵaıyn dep jatyr. Olar óz jumystaryn aıaqtaıdy. Komıssııa tóraǵasy sol jerde qalady. Jalpy jaǵdaı turaqtalǵan soń bul apellıatsııany ótkizetin bolamyz. Sebebi apellıatsııany ótkizip úlgermedik. Múmkin ol jerde de talapkerlerden ótinishter bolyp qalar. 30 maýsymǵa deıin ýaqytymyz bar. Eger 30-na deıin úlgermesek onyń ýaqytyn sozamyz, ótkizemiz», - dedi departament basshysy.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Apat saldarynan eki adam mert boldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.
Búgingi Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletindigine ýáde berdi.
Jalpy keshegi alasapyran kezde myńdaǵan ata-ana balarynan kóz jazyp qalǵan bolatyn. Qazirgi ýaqytta olardyń barlyǵy da balalarymen qaýyshty, barlyǵy din-aman.