Arysta medıtsına qyzmetkerlerine arnalǵan qaıyrymdylyq aktsııasy ótti

ARYS. QazAqparat – Arys qalasynda kópbalaly jáne turmysy tómen medıtsına qyzmetkerlerine arnalǵan «Qysqa daıyndyq» qaıyrymdylyq aktsııasy ótti, dep habarlaıdy QazAqparat tilshisi.

Oblystyq qoǵamdyq densaýlyq saqtaý basqarmasy men «DENSAULYQ» densaýlyq saqtaý uıymdary jumyskerleriniń jergilikti kásipodaǵy uıymdastyrǵan sharada medbıkeler men tazalyq qyzmetkerlerine azyq-túlik sebeti men aqshalaı syılyqtar tabystaldy.

Aktsııa barysynda Arys qalalyq ortalyq aýrýhanasynda jumys isteıtin 20 qyzmetkerge kómek kórsetildi. Bul qyzmetkerlerdiń qatarynda kópbalaly analar men páter jaldap turatyn, jalǵyz ózi balalaryn asyrap otyrǵan jáne jarylys kezinde úılerine zaqym kelgen qyzmetkerler bar. Medıtsına qyzmetkerleriniń «DENSAULYQ» kásipodaq uıymy basshylyǵy aldaǵy ýaqytta da jarylys bolǵan qaladaǵy medıtsına qyzmetkerlerine barynsha qoldaý kórsetemiz dep otyr.

Óz kezeginde medıtsına qyzmetkerleri qoǵamdyq densaýlyq saqtaý basqarmasy men kásipodaq tarapynan kórsetilgen kómekke rızashylyǵyn bildirdi.